皇家太平洋酒店 - 轉眼三十年

細個每年聖誕都會去食自助餐的皇家太平洋酒店，唔經唔覺已踏入三十週年，一連串的慶祝活動少不免。

早前已嚐過其懷舊主題的Buffet，兒時回憶番晒嚟。是夜更有幸參與其Party，一同感受歡樂氣氛。

派對同是以80年代為主題，眼見各PR朋友位位悉心打扮，好鬼嬌俏，忍唔住要提住佢哋影相。

爬地既有遊戲，又有表演，據聞幾位廚師的歌喉不得了，可惜我遲來，錯失了這經典場面。

   

這種埸合，固然不乏美食，食肉獸既我自是瞄準肉類。燒牛肉水準依然，火雞也沒有嚡烚烚，連軟腴的糯米飯食最好。

師傅摩打手即製的龍蝦包，包身軟熟，龍蝦肉的成份來得慷慨，我喜歡！

當然離不開一些懷舊食品，黃金炸魚片，香脆可口，咸蛋黃的香比上次吃自助餐時還要吸引。

懷舊飛機欖，悉隨尊便，若然有人拋俾大家，氣氛誓必更好。

仲有糖蔥餅，新一代的朋友可能真沒吃過此品。外皮不韌，咬落脆口，加埋甜生的砂糖，不知多少年沒碰過（上次Buffet例外, 哈哈!）。

蛋散與蛋撻仔，皆是我抗拒不了的中式甜點，多多無俱。

各式的蛋糕，好睇又好食，其中最引誘到我的，毫無疑問是榴槤蛋糕，外觀也真的造成像榴槤的樣子。

美食之餘，重點環節肯定係大抽獎，獎品勁豐富，機票住宿酒店會籍應有盡有，可惜一向欠抽獎運既筆者，仍是空手而回。

相信，酒店可以繼續再創高峰～

酒店資料:
皇家太平洋酒店
尖沙咀廣東道33號