2018年9月1日 星期六

LIS Cafe - 四川風情



食物:$$$1/2
環境:$$$$
服務:$$$$

如心南灣海景酒店,曾幾何時是遙不可及的地方,尤其是佢無左穿梭巴士之時,皆因我是新界仔。

自從地鐵通車後,方便百倍,黃竹坑站下車行數分鐘便到,同出銅鑼灣無大分別,甚至更加快捷。

尤其呢期酒店做緊四川主題的自助餐,嗜辣的朋友們囔著要去麻辣一番,我是義不容辭。


    


咩酒店都好,做乜主題也好,凍海鮮、刺身壽司等基本嘢係一定會有。凍蝦、青口、蟹腳之餘,生蠔固然是最搶手,是日回勇,足足吃了四隻才收手(比起以前一打仲差太遠)。


冷盤梗係注入四川元素,始終川菜有大量涼菜菜色,蒜泥白肉是其中之一,但我更欣賞的是口水雞。睇佢既賣相都好對辦,雞肉嫩滑,味型頗正宗,辣勁慢慢滲出來,以自助餐水準去計,交足功課了。


再往熱葷區瞄一瞄,辣子雞、酸菜魚、水煮牛肉等經典川菜外,仍有些別的選擇,竟還俾我見到長洲大大粒魚蛋,呢期長洲蚊患不宜入去,能在黃竹坑吃到此名物,多好~


多款川味之中,回鍋肉幾好,始終我是腩肉支持者。這除豬肉好吃,配上的涼瓜也絕不是配角,深得大家歡心。


論辣度,該以辣子雞最為厲害!本應是細細粒的雞丁,不過自助餐整太細粒又係攞嚟搞,所以佢變成了較大的雞件,更能方便大家。


其餘的如酸菜魚、水煮牛肉等,辣友們都吃得津津有味。


噹噹聲響,即是說有『特備節目』,紅油餛飩是也,吃這味,焦點在於紅油之上。


再者,仲有幾款咖喱選擇,大大舊豬手膠質豐厚,惹味的咖喱汁當然最好來送飯。


擔擔麵比預期中出色,相信大家都嚐過只得花生醬味,或者辣大於一切的出品,呢個湯底做得特別好,加上麵條的質感是我所喜歡的,萬料不到在自助餐吃到合心的擔擔麵。


胃口細既我,平時好少碰Buffet的粉麵檔,見朋友拿回來的一碗,賣相難得地精緻,值得捧一下場。


甜品有蛋散、麵包布丁、葡撻及各式蛋糕等之選,雖然款式稱不上勁震撼,卻有坊間自助餐罕見的砵仔糕,又幾有特色。


雪糕兩款口味,分別是富有四川風味的花椒雪糕,以及名牌Movenpick的士多啤梨口味之選,悉隨尊便。

愛辣的大胃王,有來的衝動嗎?


餐廳資料:
LIS Cafe
香港仔黃竹坑道55號如心南灣海景酒店P3樓
39688833

4 則留言: