[期間限定] Cucina - 幸會Chef Igor

食物：$$$$

環境：$$$$1/2

服務：$$$$

有米芝蓮三隻字，對許多人來說，已經悄悄地加了印象分。又，擁醉人維港景的餐廳，亦是另一加分點。如果有齊以上兩個原素，贏面便非常之高。

仲配合埋精彩絕倫的冰葡萄伯爵茶，咁就真係無得輸。

剛過去的週五，米芝蓮星級名廚Igor Macchia親臨Cucina獻技，小弟有幸敬陪末席，品嚐到大師所設計的餐單，大飽口福。

Cucina的迷人景致，應該唔使多講了吧，睇相啦！只恨是晚天公不造美～

我也不打算詳細介紹Chef Igor的背景，總之就是曾在多間米芝蓮星級餐廳工作，現時他所開設的餐廳亦摘下一星。有興趣知道更多的，請自行Google下。

四道菜的餐單，由暖三文魚作序。魚肉口感軟嫩，火侯控制得宜，配以帶有煙燻味道的蛋黃醬，同埋味噌醬，燻香美味之餘，亦增添亞洲風情。能有此想法，　皆因Chef Igor在台北擔任顧問總廚多年，了解亞洲人的口味。

輕柔的三文魚，與清爽而夾雜桃香之CA'RUGATE, Amedeo 2012，甚為配匹。

藏紅花意大利飯，一道看似大路的菜色，師傅注入了Burrata Cheese，好食到不得了，當然個意大利飯本身要處理得好。未講完，其實仲灑了少許咖啡粉，令對比更強。由於米飯太正，小龍蝦忽然淪為配角。再呷口LA STAFFA, Rincrocca 2015白酒，不羨仙。

主菜方面，可揀油甘、露筍，或者西冷，食肉獸既我，不難猜會是吃西冷牛扒吧！很厚身的西冷，唔容易拿捏，可幸切出來仍保持嫩紅色澤，唯可再鬆化一點。汁醬也不會馬虎，大師特以車厘子調出醬汁，頂頭再放上質感尚佳的鴨肝來伴之。

吃西冷當然是夾紅酒，挑選了PRODUTTORI DEL BARBARESCO, DOCG 2013，沒錯了！

一口清新的西柚果凍拌白朱古力慕絲，一口甜甜的Moscato，由頭精彩到尾。

是晚沒喝咖啡，因有我推崇備至的冰葡萄伯爵茶，簡直是無可匹敵。

可惜的是，Chef Igor只留港三天（最後今天），今晚未諗掂去邊開餐既朋友，把握最後機會吧~

餐廳資料:
Cucina
尖沙咀廣東道3-27號海港城馬哥孛羅香港酒店6樓
21130808