2018年8月29日 星期三

新店速遞:金田家 - 攻入荃灣



食物:$$$1/2
環境:$$$$
服務:$$$1/2

老媽子約左人晚飯,老豆有兩個選擇,一係係屋企食公仔麵,一係同我出去食拉麵,佢請。

佢好識趣咁,揀左Option B

點解食日本拉麵?皆因金田家終於在荃新天地開左分店,即以前魚米家嗰位。

以前,荃灣想搵間似樣少少既拉麵,難過登天。如今,有拉麵台風、麵屋丸京、麵道及這店的出現,總算有多點選擇。
   


新屎坑,七點未夠,已經有人在排隊,若肯坐吧枱的話,則可以直行直入,我哋兩個大男人梗係無乜所謂。


落單後,即奉上前菜。漬黃瓜,酸到眼都盲,豆腐則幾嫩滑,熱好身可以準備食拉麵。


是的,還點了一份小食,係餃子。都說過,我對日式餃子有所偏愛,可惜呢份出品,除了夠熱,無咩優勝之處。


我選了濃豚骨拉麵,先呷啖湯,湯頭夠熱,也很香濃。幾片腩肉肥瘦對開,由於是非常薄身,所以點都唔會韌,肥肉位置自然更甘香。


麵條選用幼身的一種,我要了最硬,麵條爽口之餘,也保持一定嚼勁,唔錯!


老豆既鰻魚炒飯遲遲未到,追單再追單,我的拉麵幾乎吃完仍沒送上,老爸差點兒就取消單,回家煮公仔麵食。

終於,見店員拿著兩碟炒飯出來,一碟奉過來,另一碟是隔離枱落單不久的客人。有理由相信,廚子是等埋有兩個柯打才去炒 (純粹估計)

公道點說,炒飯熱度十足,而且味道不賴,很有水準的。


餐廳資料:
金田家
荃灣楊屋道1號荃新天地1期UG層28及30號舖

5 則留言: