2018年7月15日 星期日

Main St. Deli - 爆谷添美味



食物:$$$$
環境:$$$$
服務:$$$$

酒店與各大品牌crossover,推出新產品,早非新鮮事。對為食一族而言,更加是一件好事,至少我係咁覺得。

朗廷酒店的美式餐廳Main St. Deli,最近便與芝加哥爆谷名店Garrett Popcorn合作,推出一系列以爆谷入饌的甜品和飲品。美國菜配芝加哥品牌,太合情合理!

美式甜品本已邪惡又美味,添加埋爆谷作點綴,真係唔得掂~
   


大汗疊細汗來到,坐低兩話不說先來杯喝的,就呢杯正在推介的Garrett Caramel Milkshake喇,香甜的奶昔之上,以滿滿的焦糖口味爆谷沒頂,是令人要一口飲到底的飲品,好正,同時亦好飽肚。


水牛城雞翼,大概是美國菜必點的小食吧,外香脆內嫩滑,散發陣陣辣勁的出品,惹味非常,其實這裡頭不單止有雞翼,仲有雞鎚的。


比堅尼三文治,筆者曾在灣仔的西班牙餐廳吃過,回味無窮,想不到竟可在這裡重溫。香脆的多士,夾著邪惡的半溶芝士、咸香軟熟的火腿,以及香氣四溢的黑松露醬,人間美味。依家只需加廿蚊,就可將薯條沙律等伴菜,升級至Garrett Chicago Mix爆谷。來吧!豁出去吧!


雙層牛肉,加埋半溶芝士的漢堡,乃美式食品的必吃項目。加二十大洋升級Popcorn,同樣適用。


食美國菜,甜品係不可能錯過的環節,否則不如去食其他菜系。濃郁的芝加哥芝士蛋糕,份量大到無倫,加插拖肥漿及雙式爆谷,令邪惡度升溫,睇見都好飽肚。


夏威夷果仁焦糖布朗尼蛋糕,看上去入量無咁驚嚇,但其實如此濃郁的布朗尼,吃起來都唔嘢少的。


最後是香蕉船,用上三球不同口味的Movenpick雪糕,實在太誘人。頂頭鋪滿爆谷後,成件事比預期中更震撼。

週末惠顧任何Garrett美食系列的食客,仲可以參與小挑戰,贏取餐廳美食餐劵及爆谷禮品。可惜,我食嗰日唔係Weekend~

餐廳資料:
Main St. Deli
21327898

5 則留言: