凱悅軒 - 時間限定北方佳餚

食物：$$$$

環境：$$$$

服務：$$$$

時至今日，酒店的F&B Outlet，不論中菜廳定還是西日餐廳，邀請客廚來獻技，已愈來愈普及。

就連我常光顧的凱悅軒，本月亦邀得北京Grand Hyatt 『長安壹號』的徐晉大師, 擔任客席主廚。

長安壹號，於老饕而言，應該未食過都聽過，我期待左呢餐地道北方佳餚好耐了。

    

先來的幾款小食，蒜香皇帝菜，非常之北方的前菜，爽嫩的皇帝菜以腊八蒜作調味，來得清爽醒胃。

另一款小吃，辣白菜拌鴨絲，鴨絲口感好，加埋泡過的辣白菜，辣度幾強，有如在吃韓國Kimchi。

醬香牛展，圓圓的形狀明顯是師傅下了手腳，牛展軟滑而入味，出色。

前菜都咁好，主菜有期待也很正常吧！鐵板扒蝦皇，用上緬甸大虎蝦，隻隻有我手臂咁粗，難免換來大家的嘩嘩聲，以鐵板上自當更吸引。

蝦頭多羔，蝦物肉爽彈牙，配以師傅秘制的咸香汁醬，一啖蝦肉，再呷一口芬芳白酒，不羨仙。

紅燒肉乃北方的家常菜色，加入了鮑魚，將之變得矜貴。開半的鮑魚煮得軟腍入味，然而，我始終更欣賞鬆化的紅燒肉，尤其是頂頭肥美的部份，都係果句，膽固醇萬歲～

以前叫乞兒雞，家陣俾個好名佢，叫富貴雞，以慰借大家的玻璃心。繁複的工序不在此長氣，總之師傅扑開紅泥，掀開荷葉，陣陣香氣撲鼻而來。

雞肉嫩滑有汁唔嚡口，裡頭的蓮子、咸菜及五花腩等更是重點，而呢度扑嫩雞的菜色，準會帶給大家無盡歡笑。

麻婆豆腐呢度家常又好下飯的菜色，加入了燒鹿筋後，層次更為豐富，誰要白飯請隨便叫。

濃湯栗子白菜，為一眾濃味的食品，作出了平衡。

地道炸醬麵固然可口，不過吃至此時，食力差既我只能完成半碗，分了一半給愛麵食的朋友。豬肉水餃是正宗的北方口味，個人十分喜歡。

店員奉上甜品餐牌，酥皮流沙盞早已成為我的囊中物，讚過N次也不在此重複，但時間限定的芝麻醬糖餅，更不可錯過，月底之後食唔番架喇～

Well，都唔係既，去長安壹號食囉～

餐廳資料:
凱悅軒

尖沙咀河內道18號香港尖沙咀凱悅酒店3樓

3721 7788