Follow me on Instagram

2018年2月18日 星期日

皇御園 - 開個好年


食物:$$$$
環境:$$$$
服務:$$$$

年初一食齋,年初二中午吃豐富的開年飯,這些傳統習俗,不知道還有多少人會跟著做,但我家就仍然是這樣。

隨住老豆老媽子愈來愈食得多好嘢,又唔想翻兜餐廳食肆,要找個有體面既地方食開年飯,漸見困難。

靈機一動,高銀金融國際中心嗰四間餐廳,全部都係頂級,帶兩老去皇御園開年,應該好合適,唯一係地點比較吊腳。
      


每逢去較好的地方飲茶,吃叉燒亦成為了指定動作,呢度叉燒既份量比預期中多,一上桌老豆就話:乜咁大碟架!


看上去是偏瘦的叉燒,入口十分鬆化,蜜味不算太重卻富肉香,邊邊的焦黑位更加香口,無疑是出色的叉燒。



既然是過年,就全要賀年點心。年年有餘,即豆苗星斑餃,一籠三粒。豆苗餃的皮晶瑩而不黏牙,味道很好,頂頭大片鮮美的星斑片,添矜貴之餘,亦豐富了層次,我欣賞呢個意頭點心。



鴻運當頭,查實是一味腸粉,雞樅菌脆皮紅米腸。腸粉染上紅噹噹顏色,早已不是新鮮事,但過年又真是大派用場。雖然賣相稱不上好靚仔,咬落脆米鬆脆,層次豐富,餡料之雞樅菌既爽口,味道也好。



包羅萬有,就是上高級酒店/酒家常會吃到的飽魚酥。鋪面的鮑魚個子巨大不像龍景軒般已一片片切開,但非常軟腍入味。坊間這個酥,多是配雞粒,呢度以菌類取代,配上鬆脆的曲奇撻皮,來得同樣精彩。



再來的竹報平安,我覺得係竹炭包與雪山叉燒包的混合體,賣相頗有特色,香甜而質感帶微脆,以叉燒作餡料,有創意。



淨吃點心與叉燒,恐防不夠飽,要個炒飯穩陣啲。星斑欖菜薑米荷葉炒飯,荷葉塞滿豐盛的餡料,大概是寓意荷包常滿吧!Any肥,我當佢係架喇~



米飯炒得乾身香口,星斑片份量唔少,都說炒飯最能看出師傅的功架。



粉紅佳人這甜品,係草莓奶凍、芝麻卷及杞子桂花糕的拼盤,水準唔使問都知高,仲有乾冰造成的仙氣意境桂花糕清香,芝麻卷濃郁有層次感,奶凍幼滑,通通我都滿意,所以又試了點甜品薈萃。



所謂甜品薈萃,即是蛋散、杏片芒果卷及雲尼拿雪糕。過年能吃到鬆脆的蛋散,感覺寧舍好。香芒卷外脆內甜美,好吃。雪糕是有雲尼拿籽的名牌子出品,大家應了解其水準吧!



開年開得好,相信今年會一切順心。一定係~


餐廳資料:
皇御園

6 則留言: