霞小飛 - 輕鬆如梓峰的一餐

食物：$$$1/2

環境：$$$$

服務：$$$1/2

聖誕前已相約呢個飯聚，當時還打算去食餐重慶麻辣火鍋，可惜最後因某些原因而告吹。

拖下拖下，又一個月，終於成事。因我仍有點咳，決定不吃麻辣，吃頓上海菜也無妨，反正食物是其次，開心相聚才是重點。

朋友是「順德人」，地點任由我話事，近近地，就K11的霞小飛吧！

餐廳由霞飛點心拉麵變成霞小飛已兩年，易名後，我一直沒有惠顧過。某程度上，呢間都係我To-eat list入面，但唔係十分優先個隻。

    

Happy Friday，餐廳高朋滿座是常識吧，我梗係有預先訂枱，否則風都無得食。

一見面就雞啄唔斷，食乜真係無咩所謂，最方便就是點二人餐，唔使煩惱。套餐每人跟個湯，朋友竟敢挑戰杏汁白肺湯，京川滬菜館飲呢個湯會掂？端上來時幾香，朋友評語是可以喎。反而，我這碗宋嫂魚羹，略嫌過咸。

冷盤可挑兩款，既然朋友無意見，就要我喜歡的四喜烤夫和雞絲粉皮。烤夫來得軟熟入味，如果能手撕便更加好。雞絲份量唔少，粉皮爽滑唔會斷開晒，最重要是麻醬夠多，合我心意。

難得對方唔介意同我消滅邪魔，把握機會來客外婆紅燒肉。腩肉層次分明，頂頂真夠肥美，瘦的部份亦不怕太韌，味道既濃又香，百葉結口感幾好，二人合力將之全部殲滅。

再來是鐵板乾燒蝦球，砂砂聲響，鐵板上最能保持熱度。大蝦爽口，相比起上次魚塘鴨子吃到海豚兒紅都面晒既蝦球，呢個出品溫和得多，但汁醬仍是好下飯。

甜品無得揀，係酒釀小丸子，甜度恰好，不過酒香可以更突出。

飽到上心口，好彩落漏左小籠包。

餐廳資料:

霞小飛

尖沙咀河內道18號K11購物藝術館B2樓B226號舖

28016111