2017年7月13日 星期四

紫粵軒 - 濶別餘年


食物:$$$
環境:$$$$
服務:$$$1/2

約五年前,紫粵軒剛開業之時,曾與食友在此搞過生日局,印象中食物一般般,環境卻十分優雅。

濶別餘年,水準有否改善我未能確定,只知道一位難求,之前幾次想訂枱飲茶亦不成功。

原來,店子Weekend會分三輪,而且每個時段的座位都很緊張,認真巴閉。

但願,佢係水準大躍進,才吸引到咁多客人啦!
   


數年後再訪,環境一欄沒有大變動,即使全場爆滿,感覺仍然舒適,唔怕嘈喧巴閉像街市。



拿著點心紙劃呀劃,唔覺意咁劃左好多點心。由最常吃的蝦餃開始講起,個子偏大,澄麵皮不黏牙,蝦肉足且爽口,唯餡料全是蝦肉,若可加入筍尖,我會吃得更高興。



有我在,自會不缺香口嘢。蜂巢芋角做到應有賣相,但口感可以再鬆化一點,但現在已合格。



春卷更要了兩份,炸得香脆,餡料淡淡蝦肉,爽口,醮少量喼汁,效果更佳。



香口嘢我沒有投訴,但包點類則只屬麻麻,叉燒包有欠軟熟,叉燒偏乾。食為奴的咸魚包,除海景軒外,呢度都有供應。兩邊雖煎香,咸魚香氣卻薄弱,可惜!



點心以外,又來些廚房嘢,功序繁複的蝦籽柚皮做得不錯,軟淋入味,沒帶半點苦澀味。



要有菜平衡下,明顯是挑選過的,看得出師傅是有要求。



生怕吃不飽,加碟炒飯與炒麵,最穩陣。咸魚雞粒炒飯,足料又炒得乾身,遠比無厘味道的叉燒炒麵好。



在座都不是甜人,沒再拿餐牌點甜品,要籠馬拉糕便是,大致是軟熟可口。

五年,水準無咩大改變,是不進則退,還是我已經應該要收貨?


餐廳資料:
紫粵軒

7 則留言: