2017年4月23日 星期日

國福樓 - 與家人摘星去


食物:$$$$
環境:$$$$
服務:$$$$

偶爾會扮下孝順仔,同老竇老媽子去飲茶食好西。

老媽子同我一樣,喜歡試未曾嚐過的酒樓食肆。隨著佢見識漸廣,選地方亦變得困難起來。

由於之後要去天后取蛋糕,所以就揀在港島區飲茶,我俾左兩個選擇老媽子,分別是車氏,以及國福樓。
    


佢上網睇左一陣,決定去國福樓,話坐得舒服D喎。



吃叉燒已成為飲茶的指定動作。這邊的出品,我嫌佢偏瘦,但整體而言肉質仍鬆化,邊位帶燶,蜜味足。當然如果可以肥番些少,就更迷人。



另外試了蜜汁燒鱔,鱔很好,香口又彈牙,蜜味沒蓋過鱔本身之味道,眾人皆大讚好。



點心反而只吃了兩款,其中之一是蝦餃。看摺紋是唔錯,澄麵皮晶瑩剔透,餡料足,除了蝦肉外,更混入了筍尖,是我喜歡的版本。



再來有酥皮韭菜盒,是新品。外皮真的是十分鬆化,韭菜餡香口,乃高水準之作。



與其再叫幾個點心,倒不如炒個飯吧~ 挑了同是新登場的黑松露海鮮炒飯。飯炒至乾身,粒粒分明,蝦肉、帶子等豐足,欣賞佢唔係放一堆松露醬落去,而是真的有黑松露成份。


沒有點甜品,因為會去取蛋糕,夜晚出席百日宴。

餐廳資料:
國福樓

4 則留言: