2017年3月6日 星期一

御寶軒 - 回到香港



食物:$$$$
環境:$$$$
服務:$$$1/2

有時候,老豆老媽子所得的飲食資訊,不比我慢。

例如,某一天,老豆問我知唔知尖沙咀開了御寶軒。本人雖知道新開設在北京道一號,卻未曾到訪過 (新加坡店反而惠顧過,可參考)

結果,老媽子幫襯了N次,早已成為熟客,什麼招牌菜色,邊張枱坐得最舒服,她也瞭如指掌。

認認真真定個日子,去拜完阿嫲之後,再到御寶軒飲餐茶。

   
 



的確,到埗時,部份店員已蹹得出佢係乜水。





唔理咁多,睇下有咩食最實際。正當對住點心紙睇劃乜點心之時,侍應向我們推薦午市孖寶,說很抵食很受歡迎。所謂午市孖寶,即湯加燒味雙拼。是日湯品為冬瓜蒠米,勝在湯頭夠熱,喝起來清甜舒服。




燒味雙拼乃叉燒配燒腩仔,前者用的是梅頭肉,鬆化而帶燶邊,反而蜜味略略過點。燒腩仔是偏瘦,還幸皮脆肉香,兩者大致稱心。





點心有煎韭菜粿,外皮不黏牙,韭菜餡豐滿也香,味道正路,但我覺得兩邊可以煎香口一點。





最出色的點心,大概要數到金網脆蝦腸,米網春卷炸得香脆燙口,再披上滑溜的腸粉,層次感豐富,果真不錯。





另點了客牛肉炒河粉,老媽子大讚是世界級美食。雖然出品唔差,但我又感覺唔到佢有幾咁驚為天人,只是採用的牛肉是靚貨色,或許是期望太大了,出現了落差吧!





老豆竟話想試流沙包,本人一定奉陪。包身軟熟,搣開後流心效果理想,餡香好吃。另一款是椰撻,成品漲卜卜很吸引,撻皮鬆脆,甜度恰好,不嗜甜的老媽子也吞下了全個。





靚景下嘆茶,實在是很好的假日活動。



餐廳資料:
御寶軒
尖沙咀北京道1號10樓
26139800

6 則留言: