輸在射之後??

今時今日，「贏在起跑線」的小朋友，只是平平庸庸。

大台節目話，想成為人生勝利者，需要「贏在子宮裡」，甚至是「贏在射精前」。

筆者唔明，我真係唔明，點樣贏在射精前??

原來，一切皆有數得計。算清楚日子，BB一月出世，便可入名幼稚園，名小學，名中學，名大學，之後搵到份好工，賺大錢，買車買樓，衣食無憂，跟著搵個有錢伴侶，射之前，再計過條數，整件一月B，咁就Perfect池喇！

我老豆做會計，但數口麻麻，唔識計呢條數。因此，我活了幾十年，仍是個無車無樓，無工無女，廢到盡頭，唔屎都無用既廢青。

人生勝利組，可以鋸靚扒，飲82&86 Lafite，或者Petrus。而我呢種廢青，只好留在深水埗，尋找窮人恩物。

我所指的窮人恩物，當然不是400萬的「毫宅」，而是一些平民食物。今篇，即管同大家講下深水埗，我經常去毒食的幾間食肆 (排名不分先後)。

      

最愛豬潤

漢發麵家：

由鐵皮屋茶檔，到今天入了鋪，食物水準依舊好。最愛吃豬潤麵，豬潤厚身爽脆無筋，與公仔麵，是無敵配搭。呷一杯茶走，廢青的最高享受。

 

指定動作

新香園(堅記)：

每次必吃蛋牛治，要烘底。不消三秒便會送上來，速度驚人。微脆的包身，鮮嫩的餡料，教人回味。再配杯奶茶，平民之福。另，佢豬手麵都好有名。

 

滑

合益泰：

合益泰既腸粉，賣到街知巷聞。雖只是來貨，卻真的很滑，自行狂下三色醬，在街頭啜呀啜，呢種風味，人生勝利組是不會懂的。

 

食肉獸既美食

星河餐廳：

以上三間，電視介紹過，大家可能都會認識。但呢間星河，比較低調。最愛焗豬扒飯，蛋炒飯底，鬆化帶骨豬扒，醒胃茄汁，岩晒我呢個食肉獸。

人生幾十年流流長，唔使下下要贏既，放鬆Ｄ啦香港人！

餐廳資料：

漢發麵家 -深水埗大南街192號

新香園(堅記) -深水埗桂林街38號A地下

合益泰 -深水埗桂林街121號地下

星河餐廳 -深水埗大南街374號