台慶有感：毛毛羸突了！

繼分獎禮後，毛記的另一個「大型」節目 – 台慶，由伊館移師至會展舉行，意圖或企圖呃Like萬千，同埋令人鍾意番睇電視。

門票由最平、但仍有啲貴既$380，至好乸貴的$680，火速售罄，身為毛毛忠實粉絲的筆者，毛都買唔到條。幸而，Viu TV有現場直播，仲要唔介意超晒時，一路播到尾，我才有番啲安慰。

台慶當晚，與上次分獎禮有別，fb洗版不再，外界甚至有些負面的評語，有話好悶，有話好多甩轆，有人話……事後，腦細林日曦與一眾毛毛紛紛出來say so99y，又話呢度做得唔好、嗰度做得好衰，乜乜物物，彷似虧欠左全世界咁。

唉～～應該出來道歉既9官，個個面皮幾呎厚；做場好戲既人，效果只係比預期差DD，就要爭住出來道歉，呢個咩世界呀?!

說我要求低也好，無Taste也好，雖然節目未致完美，筆者總覺得呢場仍然係Good Show。

　　　 

抽足三個半鐘

以咁既人力物力資源，要搞咁大壇嘢，無間斷抽水三粒半鐘，你估容易呀，大佬！

 

堅。係。你

斷估，你唔會想到開騷前是播人魚樂毛窮呀？斷估，你唔會諗到搵一次性特約行政總裁葉家寶來亮燈卦？做徵婚 (Friend)都徵得好趣緻，Dickson條USB線煲呔都好有心思丫～我仲估唔到臨尾會借趙學而囉。

 

周身刀既毛毛

再者，每條毛毛都講得唱得又跳得，十八般武藝樣樣皆能，今時今日，超難得。你睇下依家個個月搵緊幾十萬個班友有幾流，你就明啦！

而且，經過呢一役，我相信每條毛毛都會有所得著，點計都有羸無輸。

 

咪執呀喂～

依家既觀眾對二次創作的要求愈來愈高，的碓要繼續加把勁，但千祈唔好聽元秋講，咁快執笠呀！