Asura - 泰式沾麵體驗

食物：$$$1/2
環境：$$$$
服務：$$$$

近排對東南亞菜的熱衷程度有增無減，這天在Airside看完展覽後，又想搵泰國嘢食。

商場內的泰國餐廳Asura，已在我的to-eat list良久，趁時間尚早，未需要排長龍，即衝入去一止我既泰菜癮。

見到餐牌樣樣都想食，然而兩個人實在吃不了太多，那就專攻餐廳的招牌菜吧~

小食的炸魚露漬豬頸肉，豬頸肉切成幼條，入口爽彈，又夠香口，就咁食已經好正。沾上帶有魚露成份的辣醬，又是另一番滋味。

餐廳中文名叫得泰沾麵，那麼泰式沾麵肯定就是重中之重的招牌菜色。這款我在泰國也沒見到過的東西，像日本沾麵吃法，可配上紅咖喱蝦或者青咖喱雞，我哋揀後者。

用上清新的泰國米線，像冷麵的溫度，自行沾上青咖喱汁，有夠清爽，炎炎夏日品嚐此味，合時！青咖喱內還有雞肉、雞紅、魚蛋等，蠻特別的泰式沾麵體驗。

再來就是椰子冬蔭大頭蝦，夠酸夠辣的湯頭，寧舍醒胃。食埋開邊大頭蝦，椰子肉以及各式菇菌，連埋個湯一喝而盡，爽皮！

天氣咁熱，仲要食辣嘢，無杯凍飲肯定搞唔掂。

青檸沙冰，或者正宗的泰式檸茶，都是尚佳之選。

餐廳資料:
Asura
九龍城啟德協調道2號AIRSIDE 2樓L205號舖
91648400 (WhatsApp)