豪門小菜火鍋 - 風味宴

食物：$$$1/2
環境：$$$1/2
服務：$$$$

九龍城美食林立，最近就在一個幾具風味既地方開餐，叫做豪門小菜火鍋。

幾個為食鬼，呢樣又想食嗰樣又想食，卻遠遠低估了呢度食物份量之大 (定高估了自己的食力?)，雖然已拼命地吃，最終仍好多嘢需要打包。

小食的自家製豪門卷，相信是招牌了吧，麵包糠皮包裹著蝦膠及墨魚膠，香脆彈牙，層次豐富,有少少似蝦多士的影子。

生菜包食過唔少，多數都係肉碎配點點辣椒就是，加入埋必粒蟶子都係第一次，又幾好，沒有畫蛇添足既感覺。

點的半條豉汁蒸大鱔，還以為來錯了原條，好在水準夠高，新鮮彈牙又惹味，是全晚我最喜歡的菜式。

半隻的秘製碌鵝，份量又係唔講得笑，趁熱呼呼吃一件，肉質緊致，好香口，底下仲有唔少粉嫩既芋頭，千萬不要錯過。

芝士龍蝦伊麵上枱，巨得令大家目瞪口呆。好新鮮的龍蝦肉，鮮甜爽彈的，芝士撈伊麵呢啲邪惡嘢，其實真係無乜可能抗拒。但如果你係怕太漏既話，佢仲有上湯選擇。

來這類地方，就算食菜都要揀些香口惹味的，吃小炒皇一定錯不了。

雖則小炒皇的食材大同小異，不過每間店總有自己的特色與風味，呢度起碼夠香口，鐵膽的韭菜花、蝦乾及腰果也在陣，大大啖來一口，加枝啤酒，滿滿香港特色。

餐廳資料:
豪門小菜火鍋
九龍城衙前塱道22號地舖
23980680