嵐月 - 雅緻地方，扎實味道

食物：$$$$
環境：$$$$
服務：$$$$

家陣搵地方同老媽子飲茶愈來愈困難，皆因好多高級酒店中菜廳/酒家，佢都已經嚐過，把咀十分之刁。

醒起Airside的嵐月，裝修幾型格，口碑都唔錯，即管帶老媽子去試試。

早午有套餐，內容已齊晒點心、小菜、湯品及主食，那就費事傷腦筋，大人全部要套餐。

套餐跟三款點心，兩蒸一炸，蒸既有茴香海鮮餃，與及黑松露野菌餃，論賣相與味道，我都覺得後者比較出色。

炸的一款係三重芝士鱈魚春卷，我媽覺得芝士味太濃，佢唔係好頂得順，但我又接受到喎~

另外點了蝦餃同埋叉燒包俾小朋友食，叉燒包餡料香甜，外皮鬆熟，過關。蝦餃好足料，但因為混入了小量芹菜，小朋友就唔喜歡。

接著來是每人一盅燉湯，簡單總結，非常足料，清甜到一個點。

小菜的秋葵黑醋豬爽肉幾好，豬爽肉贏在口感，配合酸酸甜甜的黑醋好開胃，連帶秋葵都變得更吸引。

套餐總不乏蔬菜，鮮芡實濃雞湯BB菜苗，細嫩清甜，我吃了不少。

單尾的金柱松子炒絲苗，米飯炒得粒粒分明，爽身好食。吃不完，也打包了回去作晚餐。

套餐就此完結，我哋都加左少少甜品，最吸睛必要說石獅黑麻糕。兩隻灰灰黑黑的石獅子很有氣勢，打卡一流，味道都唔差，至少真有點黑芝麻的香，無乜投訴。

今餐，過到老媽子嗰關~

餐廳資料:
嵐月
九龍城啟德協調道2號AIRSIDE 3樓L301-L302號舖
28829283