昼月 - 放題迎戰

食物：$$$1/2
環境：$$$$
服務：$$$1/2

市道低迷，生意難做，乃不爭的事實。總之家陣人人都要絞盡腦汁，扭盡六壬。

銅鑼灣的Daymoon，週末及假日既中午以放題迎戰，$298讓你吃到飽。

安頓好後，每人會先有一份磯煮鮑魚及刺身熱下身。鮑魚幾腍身，是日得到之刺身有三文魚、劍魚及帆立貝。

一份刺身對於香港人來說，肯定唔夠喉，所以刺身其實都係任點任吃的，我們自然也追加了幾款，質素大致新鮮。

吃刺身，赤蝦也當然是不可或缺的項目啦！

食完「生冷嘢」之後，接著來是一系列的燒物及揚物。唐揚雞香口鬆脆，吉列蠔外脆內嫩，雞皮餃子邪惡但美味，燒鯖魚皮香魚不嚡口，個人覺得熱食比起刺身類更出色。

豆腐、蘿蔔、雞蛋等乜都要啲，關東煮雖不是什麼名貴食材，卻總有其吸引力。

再來鍋物，牛肉及豚肉都唔放過。豚肉的水準比預期中更好，安格斯牛肉都交到功課。加上鍋內的什菜及菇類，好豐富的了。

如果你對食牛好有要求既話，係可以加錢 (每100G +$88)吃A4的和牛肉。

年紀大了，總想有米飯到肚，呢度都有好幾款的迷你丼飯俾大家選擇，要牛要豚肉或是海膽，悉隨尊便。

臨尾以朱古力雪糕配窩夫作結，又係飽到晚飯都唔使食既一日。

餐廳資料:
昼月
銅鑼灣謝斐道535號Tower 535 3樓301號舖
94707280