銀杏冰室 - 助弱勢的食店

食物：$$$1/2
環境：$$$1/2
服務：$$$1/2

今次介紹一間超級超級便宜的餐廳，岩晒我呢類窮鬼。

點平法?

羅漢果茶$1，白粥$2，番薯粥$5，排骨飯$8，南乳豬手 (三件)$10....

或許大家都聽過專門以聘請年長人士為店員的社企，銀杏飲食集團，佢哋係唔同地區都經營緊唔同類型的食肆，如日式拉麵、西餐，以致素食店等。而剛才我說那般便宜的食店，就是其集團在深水埗新開業的銀杏冰室。

選址深水埗，如此便宜的定價，不難理解就是服務區內的弱勢社群為主。不過，佢打開門口做生意，是歡迎任何人士幫襯的。當然，如果是正常有能力的人士，大可識做地選擇佢一些貴價一點的東西，如$48的午餐，同埋食完快快手走人，唔好阻住有需要既人宜。

同老豆來過一次，叫左啲平價嘢，亦點了客$48午餐。豉油皇炒麵，盛惠$10，好大碟，幾爽口，係差少少熱度，但混埋甜醬一齊食，其實水準不下於連鎖店的出品。

十蚊三件的南乳豬手，每件都有番咁上下件頭，又炆得夠晒腍，墊底仲有唔少花生，連埋汁醬要來撈飯，好易清碟。

$48既午餐，有香茅豬扒飯，會跟一碗素湯，都清甜的。碟頭飯份量好大，豬扒唔少，搭幾條菜和番茄，即使是壯漢都絕對夠食。試了些豬扒，好腍身，香茅氣息輕輕帶過，當是普通的豬扒飯食就好。

午餐跟湯，但無飲品，單點杯熱奶茶都唔係$5，我同老豆每人一杯，質素屬不過不失水平。

門面仲有啲麵包供應，大部份都係$4/個，買了三件回家下午茶。

餐廳資料:
銀杏冰室
深水埗醫局街203號地下5號舖
27788966