2023年1月30日 星期一

港灣壹號 - 開年



食物:$$$1/2
環境:$$$$
服務:$$$$ 

年初二既開年飯,一定要食好啲。今年揀左去Grand Hyatt的中菜廳港灣壹號。

港灣壹號都算係米芝蓮既滄海遺珠,食物服務俱不錯,卻一直無緣上榜。或者都係好事嚟,起碼可以容易啲訂枱,唔使好似其他星店咁,動輒要等一兩個月。

食叉燒,早已成為飲茶的指定動作,今次在訂位時已經留定份細的。厚切、燶邊,肉質鬆化且有肉香,唯一就是缺少了一點點的蜜味,但已經合格有餘了。

之後是一系列的點心,鮑魚雞粒酥比較的骰,佢沒有好似龍景軒咁細心會將鮑魚切開,食既時候係無咁方便,還幸鮑魚仍是軟腍入味,撻皮鬆脆,鮑魚下的雞粒索盡精華,無乜理由會唔好食。

如魚得水係賀年限定的點心款式,說穿了就是鱈魚餃。過年嘛,餃皮色澤要鮮艷,外型都幾靚仔,鱈魚既餡料幾豐富,味道不俗。

腸粉講唔上晶瑩剔透,皮係偏厚,唔夠滑溜,但勝在用料靚,帶子鮮爽,不過不失。

燒賣都係大路貨色,至少唔怕死實實。

鹵水豬腳仔就好唔錯,色澤到位,皮爽身,肉夠軟嫩,又入晒味,連吃幾隻先識收手。

酥皮焗海參柚皮看上去就好似西式的酥皮龍蝦湯,然而當掀開酥香的酥皮,裡頭就是海參、柚皮、花膠與及冬菇。柚皮厚身亦鬆化,但略嫌未夠入味,海參及冬菇就贏在口感之上。濃郁既鮑汁當然不應浪費,用酥皮沾來吃,滿足。

食碗麵比較好意頭,要來魚濃湯蟹肉蟹皇伊府麵。一向喜歡伊麵既口感,呢度個濃湯更加精彩,連埋勁足料既蟹肉以及蟹皇,有如畫龍點睛。呢碗麵,抵讚!

蛋撻仔勝在熱辣辣,撻皮鬆化,若然蛋香可以再濃郁些,就更迷人。

自家製的雪糕及雪葩,一向是此酒店的招牌甜品,一於要客無糖椰子和桂花雪梨五糧液雪葩,好吃,不過五糧液的氣息好薄弱。

以一記清爽的楊枝甘露作結,甜胃也沒有投訴。

過年要做兩輪,我完全明白,乖乖地準時還枱,唔好阻住地球轉,大家開開心心過年就好!


餐廳資料:
港灣壹號
灣仔港灣道1號君悅酒店7-8樓
25847722

沒有留言:

張貼留言