2022年12月23日 星期五

良順興 - 貼地享受



食物:$$$$
環境:$$$1/2
服務:$$$$ 

早已聽聞大角咀良順興的大名,只是遲遲未有機會到訪。

某天收到朋友的短訊,話想在這兒搞一局,問我有無興趣一齊食餐飯吹下水。

呢位朋友,當左良順興係佢既飯堂,店內差不多每道菜色佢都試勻。有佢打點,我真想不到推卻的理由。

不消一會,佢已經寫好左張菜單Send俾我,其實我睇都無睇過,已經回一個OK手勢。難道我仲信唔過佢咩?!

人齊起菜,打頭陣的是椒鹽鮮魷,香脆外層,鮮魷彈牙唔韌,惹味非常,一嚟就有個好開始。

接著來的煎肉餅做得香口,頂頭鋪滿咸蛋黃碎以及瑤柱絲,好吸引,下次自己試試咁樣整先。

跟住就係為食肉獸而設既梅菜扣肉,肥瘦間開的五花腩,甘香鬆化,與甜梅菜是絕配,朋友們急不及待叫碗白飯來伴之。

蟶子配炸米粉在我的Fb經常會出現,相信是必點的東西。今次既出品,賣相與之前食友貼出來的有所不同,這次是改良過,炸米粉放係面。論賣相是沒有以往般澎湃,然而米粉沒有被汁醬浸腍,吃起來是相當清脆可口,自行沾適量的豉椒汁,本身已很好味。當然,蟶子亦是很有質素,爽脆不韌,眾人都拍爛手掌。

來一道足料到瀉既上湯腐竹生菜來間一間場,跟住嚟仲有好多重口味既嘢食等住我哋。

爽彈入味的豉油皇大蝦,每人有兩隻。

原本食埋呢個鑊氣十足,河粉條條分明,均勻上色的乾炒牛河,就已經完結。不過,由於各款嘢食既水準都超出預期,在又凍又落毛毛雨的Happy Friday,大家一於再去盡啲,追加多幾味。

金黃色既雞翼隻隻飽滿,好誘人。剛剛炸起,吃時要小心燙口。皮脆肉嫩又juicy既出品,一隻唔夠喉。

豬皮雞煲並不是辣到噴火之作,只是很輕微的麻香,好正斗,而且迷你份量也不少。

同樣是迷你版的酸菜魚,未知是否熟客仔既關係,魚片超多,又滑溜。湯底辣度溫和,酸味恰好,在凍冰冰的天氣呷幾口,寧舍舒服。

仲有好多菜色想試,如東升斑兩食、菜甫肉碎煎蛋、麻辣大腸豬皮等...

定個日子,組隊再來吧!


餐廳資料:
良順興
大角咀博學里9號富多來商場一期地下60號舖
36115435

2 則留言:

  1. 有熟客打點,食得特別爽!話時話,我都好耐無食過乾炒牛河啦!

    回覆刪除