2022年1月19日 星期三

1986地道越南餐廳 - 勇往直前



食物:$$$$
環境:$$$$
服務:$$$$ 

初次認識這店,大約是一年前既事,當時店子在土瓜灣馬頭角道,晚上收工我想入去食碗牛肉粉。

正準備填紙仔既時候,店主回應一句:唔好意思,我哋係A區,晚市只有外賣。

有骨氣,我好想支持,不過土瓜灣回家要成粒鐘,我無奈放棄,另覓地方找吃。

最近得知佢係同區的北帝街開設分店,面積更大,家陣晚市直頭禁堂食,我就中午過去支持下。

胃納本身已經細,加上是日胃口久佳,但又想試多些美食,認真矛盾。放棄了飽肚的飯類,選了碗三拼牛湯河,分別有牛腩、牛丸以及扎肉。

湯底走清鮮路線,牛腩帶有脂香,牛丸做得彈牙,都合心意,扎肉則怡如其份,還喜歡佢加入了幾片油炸鬼。

實在沒太多食力,小食只要最便宜的海防肝醬小法包,有三條。鴨肝醬與幼身法包這個組合,肯定穩陣,只嫌肝醬未算很香,不過加入了附設的辣醬,味道是幾何級數提升。鄰桌食客見我吃得津津有味,也來一份,結果亦大讚美味。

沒喝越式滴漏咖啡,因我在餐牌上發現了更吸引的,海鹽青檸可樂。我未試過這組合,可樂的甜中滲出咸咸酸酸的味道,又幾過癮。

聽見鄰桌食客同佢朋友講,呢間店係Mee既評分好高,果然不錯。

原來,又是專程來支持的。

上網見到深水埗有間同名既新店子,仍未有任何食評,到底是承勢開枝散葉,抑或只是同名同姓?


餐廳資料:
1986地道越南餐廳
土瓜灣北帝街60號東寶大樓地下A號舖
22198622

4 則留言: