2021年11月22日 星期一

萬豪中菜廳 - 首個蟹宴



食物:$$$$
環境:$$$$
服務:$$$$ 

聽說今年的大閘蟹又平又靚,身邊朋友紛紛讚好,但我一直未抽到時間去食,錯失了一次又一次的機會。終於,到十一月中,可以首次品嚐本年度的蟹宴,地點卻是在比較偏遠的天際萬豪酒店。

一心來食蟹,也懶得再諗太多,叫個蟹餐直截了當。呢個大閘蟹套餐內容十分豐富,先來的三小碟,油炆箭筍爽脆而無渣,黃魚以繡球型狀呈現,炸得酥脆。叉燒鬆化帶蜜味,這裡的叉燒從來有水準。

套餐會跟一隻蟹,若果唔夠喉,可以再追加。細心位係會讓你品嚐完一隻,店方才再奉上另一隻,避免放涼而影響食味。

五兩重金毛的蟹公,蟹羔甘香而份量不少,蟹肉飽滿鮮甜,果真不錯,佐以香醋,吃得我津津有味。

套餐當然也有湯品,是花膠鱈場蟹鉗燉烏雞。對星級酒店的燉湯從來沒有懷疑,花膠件頭大,有彈性,加隻鱈場蟹鉗,同烏雞,啖湯自然清甜,其實打開盅蓋時那陣陣的香氣,已告之一切。

接下來的煙燻乳鴿,打開蓋子,輕煙冒出,仙境畫面出現。乳鴿個子唔細,肉嫩而皮香,結合茶燻之香氣,用手拿起吃,滋味無盡。

菜蔬也不欺場,賣相別緻的紅柿瑤柱浸時蔬,清一清味蕾,感覺舒服。

稻庭烏冬本身已滑溜,再將澎湃的蟹粉鋪在上面,甘香美味,精彩到一個點。

結尾的薑茶湯丸勝在夠辣,又混入了桃膠,女士應該更喜歡。

本年度的首個蟹宴,相當滿意,看來要安排吃第二餐了。


餐廳資料:
萬豪中菜廳
赤鱲角香港國際機場航天城東路1號香港天際萬豪酒店M樓
39692888



4 則留言: