2021年9月17日 星期五

夏宮 - 十年如一日



食物:$$$1/2
環境:$$$$
服務:$$$$ 

小時候很抗拒上茶樓飲茶,並不是討厭食點心,而係最憎排除。當年既大酒樓,週末閒閒地要等幾十張枱,一個鐘頭走唔甩。加之,酒樓地方雖大,但非常嘈雜,而且枱與枱之間又放得密,往往是背貼背的坐著,總之絕不享受。

人大了,多了吃一盅兩件,但仍不愛上酒樓,要吃的就揀酒店中菜廳,我只想舒舒服服食餐飯。夏宮那宮廷式的裝潢,當然做到這一點,雖然今時今日的五星級酒店,食個午餐也要分兩輪,限時限刻。

忘了何時開始,食叉燒是飲茶的指定動作。這裡的叉燒份量頗大,明顯是兩個部份,一邊是偏瘦,另一邊太肥,如果可以平衡到就好。硬要在偏韌與肥脂之間作出選擇,我會毫不猶疑地選擇肥叉。

我總覺得,要有蝦餃或燒賣,才像是飲茶,人多則可以食齊兩款。蝦餃形狀靚仔,燒賣是加入了帶子片,但味道都是略淡了些。

個人喜歡吃香口嘢,所以對鵝肝火鴨絲荔芋盒特別有興趣。外層是炸得鬆脆,芋茸亦細滑,但明明已加入了鵝肝,仍是偏淡口,吃芋角有需要那麼健康嗎?

露筍鮮蝦腸粉,面頭鋪滿蝦籽是吸引的。用料上乘是必然,但皮稍厚是要改善,同埋又係果句,太健康的味道囉。

之前幾款點心總好像差一點點,但接著來的就回勇。脆皮叉燒餐包漲卜卜好大隻,咬落微脆而餡料軟熟,倒是不錯。

馬友燒餅質感鬆脆,咸香味道正合口胃,還是重口味的東西較合意。小朋友最愛食蒸饅頭,軟熟又唔會一陣麵粉味,大人則可以沾些煉奶來伴之。

新鮮出爐的蛋撻,鬆化又熱燙,總唔會難食得去邊。

生怕吃不飽,來碗炒河最穩陣。尖椒豚肉炒河,吃得出師傅的功架。

甜品方面,西米焗布甸對我來說唔夠燶,楊枝甘露與我上星期在東涌新酒店吃的相比,是有所不及。

最好要數到燉津梨,夠清潤。


餐廳資料:
夏宮
金鐘金鐘道88號太古廣場二座港島香格里拉酒店5樓
28208552

4 則留言:

  1. 正呀,我今日又係諗起想食呢種叉燒包!又,我小時候去飲茶唔洗排隊,因為朝早未夠七點已經開餐,哈哈!

    回覆刪除