2020年11月30日 星期一

SO TAM - 羅素街八號 (下集)



食物:$$$1/2
環境:$$$$
服務:$$$$

上一篇文章介紹了旁邊的中菜館『嚐。捌』,呢篇就輪到越南菜那邊。

店子命名So Tam,我唔清楚係咪越南話,只知道食友約我來吃地道的越南火鍋。不諱言,我是從沒在香港試過越式打邊邊。

火鍋前,先來幾味地道的越式小吃。說到經典的越南小食,牙車快與青木瓜鮮蝦沙律是當中的佼佼者,蝦肉新鮮爽口,沙律清新,正好打開胃口,是很好的開場。

當然也有幾款香口嘢,串燒大概是不可或缺的項目,豬牛雞三隻味,平時我一定會投牛肉一票,但今次卻是嫩口的雞肉獲勝。

越式的雞翼特別討我歡心,肥嘟嘟,外皮酥脆滿有蒜香及牛油香,肉質細滑,是邪惡了一點,但好味丫嘛!同樣熱氣的,仲有春卷,炸至脆卜卜,咬落就是『咔嚓』的聲響,配合充足的餡料,岩晒我。

未完未完,要繼續熱氣下去,炸軟殼蟹又如何? 相當鬆脆的口感,肉亦多,如蟹羔可以豐富點就更好。

吃完一大輪,主角的越南火鍋也終於上場。湯底有鮮茄蟹湯和椰子雞湯兩款選擇,商議後決定要前者。咁大的一盤火鍋,又牛肉又濱海又又魷魚及蜆肉,湯內仲有豬紅、豆卜等,才賣二百多塊錢,我以為自已眼花。食肉獸既我自然是大塊大塊肉咁淥,鮮甜的蜆肉也吃了不少,再呷幾口湯,滿足。

生怕吃不飽,有人建議點份法包大家分吃。法包夠脆口,豬頸肉作餡其實不常吃,但結合肉鬆,又唔太差。

飽到上心口,以菠蘿香茅乳酪這甜品來消消滯,合適不過。

越南咖啡非常濃郁,即使已有頗多的煉奶,入口也是勁苦,乃十分地道的口味。

你飲完咖啡夜晚會否眼光光?


餐廳資料:
SO TAM
銅鑼灣羅素街8號英皇鐘錶珠寶中心2樓
23231299


2 則留言: