2020年12月4日 星期五

留家廚房 - 善待自己



食物:$$$$
環境:$$$$
服務:$$$$ 

W小姐雖是老饕,但身居要職,日理萬機,要約她食飯並不容易,以往大概是一年聚兩次。

年尾也是時候見個面,食乜嘢由我話事,上次吃西餐,今云一於去食中菜喇,我又想吃濶別餘年的留家廚房。

識佢咁多年,從沒聽過她說工作上有什麼問題,不過今次碰面,卻是呻到樹葉都落埋,本年真是非常艱難的一年。

在看不見未來的日子,更應該活在當下,吃好一點不要虧待自己。我選來這裡,說穿了是為重溫戈渣的美味。家陣香港還有此品供應的餐廳,十隻手指數得晒,畢竟製作繁複,又賣不起價,呢度係其中做得最出色的地方之一。

金黃呈菱形的戈渣,賣相依然對辦。這東西必須要趁熱食。外微脆內嫩滑,帶點點糯口,本身已夠味,沾些砂糖吃更好。每人兩件作小吃,恰好。

隨之而來的苔條九肚魚,熱度十足,吃時要小心燙口。超級鬆脆既外皮,細嫩的內餡,滲出陣陣海苔的清香,十分好吃,絕不是坊間的一般食肆能夠媲美。

煙燻雞是要等候三十分鐘的項目,反正唔趕時間,照等!成品出來陣陣燻香,吃起來肉嫩皮爽,煙燻夠香但沒蓋過雞的鮮味,溫度亦充足,高水準之作,旁邊的雞什我們當然唔會錯過,吃得一粒不剩。

甜品前來個蔥油拌麵,竹昇麵幼細且爽口,香氣與熱度皆十足,已忘了多少年沒嚐過如此出色的拌麵。

簡單以芝麻卷作結。其實製作這菲林筒亦不簡單,從橫切面可看到層次豐富,口感軟熟,還有濃郁的芝麻香,滿意。

九點左右,連埋我哋只剩兩枱客,係咪要識做早啲埋單走人呢?!


餐廳資料:
留家廚房
灣仔軒尼斯道314-324號W Square5樓全層
2571 0913

3 則留言: