Fabrice 嚐味: 肉肉強食 - 短時間內再訪

2020年11月3日星期二

肉肉強食 - 短時間內再訪

食物：$$$1/2
環境：$$$1/2
服務：$$$1/2

心水清既朋友或者會記得，筆者無耐前才惠顧過呢間餐廳，由於實在過份抵食，我決定帶老豆來見識下。

某個週三，老媽子有活動，兩父子就去左食Lunch~

時間尚早，人客不多，我哋被安排坐六人卡座，老豆話：地方幾大，坐得好舒服喎！

其實，店子大部份卡座都是可坐六人，堅係正的。

海報中的美式什扒餐，現正在做半價，三十九蚊搞掂，我再加了十八塊錢轉餐，餐包、餐湯、薯條、甜品及咖啡/茶包晒。

老豆要紅湯而我就飲白，羅宋湯酸酸地幾醒胃，仲要勁足料。忌廉湯跟上次一樣，唔怕太稀，仲有蠻多的磨菇及粟米粒在內，配埋個衛星餐包，飽~

許多時，圖片只供參考。不過呢個美式什扒，份量真不下卡那張海報，好誇張！西冷薄身但勁大塊，豬扒同樣大個我塊面，雞翼是雞全翼，仲有長長的煙肉及珍寶腸。店員倒入洋蔥汁，沙沙聲響過後便可起動。西冷與豬扒之間，我較喜歡後者，多一份咬口，但肉質唔會嚡。煙肉大片又唔會乾柴柴，但最好是雞翼，大隻又香口。伴的除了薯條，仲有大量的翠玉瓜、西蘭花及紅蘿蔔等，正好作個平衡。