肉肉強食 - 時光倒流廿年

食物：$$$1/2
環境：$$$1/2
服務：$$$1/2 

人老左，被社會淘汰左，自然就會減少社交活動，一條友懷緬舊事。

本打算去長沙灣金園回味下黑椒豬扒炒意粉，但去到見佢拉了閘，門口貼著星期四例假。何時金園巴閉到會休例假? 我真係脫晒節。

忽然想起一間筆者仍未試過的半新店 – 肉肉強食。係港式豉油西餐，最重要是與鋒膳有關，我才有興趣。

高中時期差不多天天都吃一所豉油西餐廳，叫京都，不過已經消失左好耐，呢間肉肉強食能唔能夠勾起我既回憶?

瞄下餐牌，價錢真的倒流至廿多年前，鐵板什扒正在做特價，盛惠$39。是否難以置信? 未算，最便宜的吉列豬扒，只是$20。再加十八塊錢，可轉餐，有齊餐湯、麵包、飯/意粉/薯條、以及甜品，我擦一擦眼睛，以為自己眼花。

白湯唔會好稀，味道濃郁，還有不少粟米及磨菇在內，最緊要係夠熱。呷啖湯，再自行在微暖的圓餐包塗上牛油，吃罷已飽了一少半，真係無咩可投訴。

我點的肉眼扒，同樣是鐵板上，可揀醬汁，反正之後沒有約會，口臭就口臭，配個蒜茸汁吧！侍者在你面前倒入汁醬，沙沙聲響大概是港式西餐的精髓，唯一是欠缺了一張紅色的紙巾，來防止汁醬弄髒衣服。

咁既價錢，店家更標榜不用鬆肉粉及食粉去『招呼』肉類，質感的確唔韌亦唔會好假，肉味相對濃郁，加埋翠肉瓜、西蘭花、車厘茄及薯條，食肉獸表示份量好足。但，原來今時今日既我，已不太喜歡鋸扒，肯定是年紀大了。

雪糕與啫喱之間，筆者挑後者。一杯菠蘿啫喱，放入花奶，完全是經典。

飽到要杯熱檸檬茶來消滯。

我想，下次帶老豆來見識廿蚊既吉列豬扒，到底會是咩樣子~

餐廳資料:
肉肉強食
長沙灣東京街31號1樓
23610031