2020年4月28日 星期二

喫麵 - 增添新味



食物:$$$1/2
環境:$$$$
服務:$$$$

插翅難飛的日子,點樣先可以好似圖中隻熊仔咁疏肝,可以輕輕鬆鬆咁歎勻多國美食?

方法當然有,就係去筆者之前亦推介過的Yummee,呢間嘢好變態,全亞洲的美食都可以係度食到。

店子開初以賣亞洲麵食及點心為主打,家陣已經進化到連特色米飯類亦有供應,包括海南雞飯,以及日式咖喱飯。
        


海南雞飯賣相討好,配上油飯、湯、醃蘿蔔青瓜,當然仲有最重要的三色醬。海南雞肉質嫩滑,三色醬都做得對辦,但我素來只鍾情黑漆漆的甜醬油。油飯亦不俗,不會硬轟轟。近期經常戴住口罩焗到無乜胃口,酸酸甜甜的漬物正好發揮作用。


另一客是咖喱吉列豬扒,甜甜的日式咖喱汁最好下飯,加上香脆鬆化的吉列豬扒,只會令人在不知不覺間吃多了米飯。


猶記得這兒的點心水準唔差,所以又點來了一些。印象中蝦餃好吃,今次出品形狀都保持得幾好,大大粒,裡頭蠻多蝦肉,好足料。


紅油抄手算不上很正宗,大概是港式版本,但同樣足料,微微辣勁更醒胃。


估唔到餐廳竟有印度美食,薯蓉咖喱角,香口嘢自然岩我,醮上酸甜酸甜的汁醬,仍是討好。


飲品種類繁多,上次喝的凍檸啡成為我的及時雨,今云要試試有可愛熊仔作冰塊的泰式奶茶,更配上珍珠,比起一些泰茶專門店更為出色。

拿了瓶檸檬蜂蜜漬跟俾好友清潤下...

餐廳資料:

喫麵

4 則留言: