粵 - 又一抵食午餐

食物：$$$$

環境：$$$$

服務：$$$$

限聚令之下，餐飲食肆更加難做，那管你食物好吃得飛天，或是米芝蓮幾多粒星星，都係度捱緊。

推出超筍優惠，係無辦法之下的辦法，很多酒店餐廳也在做。

北角城市花園酒店中菜廳都唔例外，商務午餐好抵食，足以飽到上心口，另外有十幾款點心半價，其實唔知應該開心定悲哀。

         

日子點困難都好，飯仍是要吃，就來享受下優惠。除了商務午餐，還點了幾款點心，盡情發洩下。XO醬煎腸粉，成品香口惹味，腸粉軟熟唔會死實實，自家製作的XO醬當然功不可沒。

另外柯打的墨魚餅，彈牙鮮味，重點是混入了不少粟米粒，口感更豐富。多年沒吃過的懷舊點心豬潤燒賣，能在此重溫真係好幸福。豬潤粉嫩，沒半點腥，加上足料的燒賣，不錯吃的。

接著是商務套餐的菜色，打頭陣的是燒味雙拼，可自選兩款，我就挑了叉燒拼雞。叉燒看上去是偏瘦，但入口鬆化，雞肉滲出陣陣燻香，蠻有水準。

話晒係抗疫時期，午市套餐自然不乏湯水，給大家滋補下。是日的螺頭燉竹絲雞，湯頭非常熱燙，岩晒筆者心水，我始終覺得飲湯一定要夠熱。再者，啖湯也是十分清甜，畢竟酒店的出品，自是有信心保証。

喝過湯後，寧舍舒服。再來就是兩款注入酒香的菜色，先係花雕蛋白蒸龍躉球，酒香結合細滑的蛋白，呢味餸唔使問都知好食，龍躉球的口感也從來是我杯茶。

之後的干邑生煎雞球，上桌時店員才倒入干邑，好容易令人產生少少醉意，繼而唔知會唔會發生...

以石鍋上的肉餅，頂面之球體是以份子料理概念打造而成的豉油，吃時將之破穿，讓汁液滲進肉餅上便成，好有趣，而且熱呼呼的也挺好吃。

瑤柱蛋白炒飯，炒得乾身爽口，常說簡單的炒飯最易看出師傅功架。

最後整碗杏仁茶甜一甜，作個幸福結尾，原來有豆腐墊底，雙重口感，師傅真有心思。

大家努力，捱過呢一關吧！會過去的~

餐廳資料:

粵

北角城市花園道9號城市花園酒店1樓

28064918