2019年7月31日 星期三

萬豪中菜廳 - 來自天邊的驚喜



食物:$$$$
環境:$$$$
服務:$$$$

相隔兩年半,再訪天際萬豪,環境依舊,但人客多了唔少,坐滿九成,唔知係咪博覽館有Event呢?

話說我從火炭趕去東涌,卻Miss左酒店的穿梭巴士 (送車尾嗰隻),唯有死死地氣去附近的士站排隊搭的。

到埗時,大家已安排好菜色,可以起菜。
    


三十四度高溫,有須要以冷盤打開胃口。雲耳海蜇花,兩款均是爽口的東西,配以酸度恰好的陳醋,醒胃可口。


來到夏季,師傅有不少菜色是以水果入饌,包括小碟的玉帶梨香。當然不是首嚐呢款清爽菜色,梨肉、蝦膠及帶子的組合,口感爽脆,層次豐富,好味。


接下來是每人一小片的蜜餞火方,講起來也有好一陣子沒嚐這道浙江名菜。金華火腿鬆化帶咸香,甜甜的蜜餞是呢個菜色的精髓,中間一片清爽的青瓜中和膩滯感覺,愈食愈滋味。


叉燒是每次到來必吃的東西。叉燒一如以往的偏瘦,但口感爽彈,滿有肉香,在熱石及汁醬的襯托下,如霧如煙,全像遊戲... 吞下兩件不成問題。


鴨胸與奇異果呢個組合,雖然罕見,其實也不是第一次遇上。然而,以桂花糖來伴之,就真係首次見識,效果又唔錯。


再來的芝香牛油果焗大蝦,採用巨大的越南虎蝦,肉質彈牙是意料之中,但牛油果似乎未能帶出清迎氣息,個人還是喜歡配上芒果以作平衡。


還有蟹蓋,香脆的外層之內,是一梳梳的蟹肉,足料澎湃,欣賞佢配上蟹醋,而不是喼汁,懂吃的自會明白。


鮑魚軟腍入味,底下的節瓜圃,中心是我喜歡的蝦膠,層次與味道更上一層樓。


吃至此時,其實已飽得八八九九,再來一大磚既東坡肉,肯定爆肚而回。師傅以紅酒和葡萄來溶化這邪惡軸心,令鬆化的肉質滲出點點酒香,相對溫和而不膩,非常好!


仲要感謝大家安排的生日驚喜,真正的Happy Friday~

餐廳資料:
萬豪中菜廳

2 則留言: