食物：$$$$
環境：$$$
服務：$$$1/2
曾幾何時，澳門的細龜干炒牛河非常馳名，傳媒和食家爭相介紹，人人慕名而去，搞到細龜不勝負荷，炒到佢受傷。
個人認為，對面的六記，水準並不下於細龜，只是當年細龜的名氣太大而已。
家陣，細龜發左達唔使撈，輪到六記既世界。我們七點半來，排到天昏地暗。
如果肯大熱天時坐係外面
(其實都有大風扇既)，可以唔使等。眾人商議過後，一致通過坐出面，但每人要先整罐可樂去平衡下心理。
柯打了一大堆食物，首先送上有肉丸粥。粥底綿滑，肉丸是手打，唔會死實實，熱到hihi的天時食一碗，也沒有不悅的感覺，水準可想而知。說實話，很久沒喝過如此靚粥了，或許我平時係香港太少食粥品吧！
干炒牛河是這兒的名物之一，夠鑊氣，河粉唔怕疊住疊住，條條均勻上色，牛肉沒經嚴重的化學洗禮，真不比當年細龜遜色。
淨雲吞掂，皮滑肉爽，湯底清鮮，大家皆讚賞。
蝦籽撈麵都好正，麵條爽身彈牙，沒半點鹼水味，配合大量咸香的蝦籽，好味道。由於雲吞及竹升麵俱美味，有人決定追加雲吞(湯)麵，結果也沒有令人失望。
豉椒炒蜆，勝在惹味，我哋坐埋係外面食，更加有風味。
本想叫錦鹵雲吞拼鯪魚球，店員怕大家唔夠食，建議散點各一，就跟店員吧。錦鹵雲吞，餡是細細粒加大邊幅的外皮，炸至鬆脆不油，跟上的一碟甜酸漿，是有紅黃椒及豬腸等，甜酸漿根本就是要這樣，唯酸味是稍重了一點。
蜆芥鯪魚球的水準就很超班，外層非常鬆脆，內裡軟熟又夠熱，沾些蜆芥醬同吃，太精彩，在香港真吃不到這個水平的出品。
吃罷咁多香口嘢，最後來碟菜平衝下，是有必要的。
食到大汗淋漓，但十分滿意，沒有人抱怨過一句。
餐廳資料:
六記粥麵
干炒牛河見到都想食！
回覆刪除真的
刪除