LEVELthirty - 放鬆...一陣子

食物：$$$1/2

環境：$$$$

服務：$$$$

終於星期日，係時候鬆一鬆，飲飲食食始終是我的首選，去歎個Sunday Brunch吧！

沙田石門的Courtyard by Marriott Hotel，地點是僻左少少，不過頂樓的Levelthirty，我曾來過飲嘢，確又是個不錯的選擇。

點解？景觀好正囉～居高臨下，遠眺成門河及馬場，尤其是日天氣好，陽光射入來，感覺溫暖舒服。

   

在如此悠閒的地方，呷口Laurent Perrier Brut香檳，一切煩惱，可暫時放下。

四道菜的早午餐，頭盤可揀海鮮拼盤或香煎吞拿魚沙律，我哋五個人，大可吃齊兩款。

海鮮拼盤，有齊蝦、青口、蜆、翡翠螺等，青口漲卜卜，翡翠螺唔怕韌得像吃擦字膠，大致不俗。

吞拿魚沙律，魚邊沾滿黑椒，吃起來辛辣味幾強，怕辣的朋友要注意。呢個級數既酒店，用上的沙律菜固然新鮮。

接著來的野菌忌廉湯，味道香濃，只要配麵包吃，不自覺便會把湯清掉。

主菜四選一，尖通粉配蔬菜及蕃茄汁最為普通，或者是因為太素，食肉獸如我自會感覺太寡，但其實味道得宜的。

香煎芝士豬柳拌南瓜意大利飯反而很合口胃，特別是米飯，口感好之餘，充滿南瓜清香氣息，比鬆化的豬柳更為優勝。

什錦海鮮，當然有開邊龍蝦撐場，另外青口及蝦等繼續出現，還有膽固醇萬歲的魷魚，同埋煎三文魚，要提三文魚皮煎得好脆口。

最後一份主菜，係牛腹肉，由於配上特濃的黑醋汁，而且醬汁份量唔少，驟眼看來有點似心太軟。

用刀切開，似乎稍稍過熟，吃起來的確未算很鬆化，還幸味道可以。配角的薯條和紅椒及翠肉瓜，又做得唔錯。

甜品只一款，無得你揀，係特濃朱古力慕思球，睇賣相以為外層是脆卜卜的一款，原來卻是軟身的。個波都唔細，而且味濃，要應付全份也有一定難度，最終我盡全力也只清了三分之二。

結尾一杯Latte，令整個Brunch感覺更圓滿。

每天都可以如此輕鬆，就好了。只是，發夢未有咁早。

餐廳資料:

LEVELthirty

沙田安平街1號香港沙田萬怡酒店頂層

39408388