2018年4月8日 星期日

御寶軒 - 假日大飲茶



食物:$$$$
環境:$$$$
服務:$$$$

復活節四天長假,身邊不少朋友外遊,筆者卻選擇留港,悠悠然的渡過,眨下眼幾日其實好快完。

假日節目不外乎飲飲食食,同外甥女飲餐茶,大概是必然項目,起初打算去將軍澳近佢,最後還是決定御寶軒。

有人說御寶軒摘星後,開分店後,水準略為下降,我唔知堅定流,皆因我有超過半年未到訪過,希望只是流言。
   

托外甥女既鴻福,可以坐房,吃得更自在。


食叉燒,已成為近年飲茶的指定動作。今次呢碟,燶邊香口,質感鬆化,但對一般人來講可能較肥,要靠我呢個正義既朋友將之消滅。


再要幾款點心,喜愛香口嘢既我,挑來沙律明蝦角。香脆熱辣,塞滿蝦肉,醮埋醒胃既沙律醬,只嫌吃一隻不夠喉。


豉汁蒸鳳爪,唔會溶溶爛爛,而且夠入味,很怕那些一Pat嘢的鳳爪。


都話我中意香口嘢,腸粉也要金網脆皮蝦腸,是這裡的招牌點心之一。蝦肉豐足,米網春卷香脆熱辣,加埋拉得薄的腸粉皮,保持水準。


黑椒牛崧包,以鍋上最能保持熱度。包身軟熟,不怕黏牙,餡料不少,黑椒沒有太過辣而搶去風頭。


菠蘿咕嚕肉件件好大舊,好在鬆化,甜酸味道平衡尚可,菠蘿、青紅椒都唔好錯過。


檳城炒河粉,有微微辣度,我覺得可以再惹味點。不過,配料如腊腸、蝦球,以致雞蛋等,都算合格,挽回些分數。


假日對著維港景飲茶,心情卻難以放鬆,何解?


餐廳資料:
御寶軒
尖沙咀北京道1號10樓 
26139800

5 則留言: