萊茵河餐廳 - 河畔晚餐

食物：$$$1/2

環境：$$$$

服務：$$$1/2

身為荃灣人，對大霸街的餐廳食肆，自然唔會陌生。由魚蛋粉車仔麵，到茶餐廳，以致西餐廳及小廚，基本上統統幫襯過晒，其中一間我認為較出色的，就是Rhine River。

大概在兩年半前，餐廳剛開業之時，我曾撰文，讚過這裡的Carbonara。

從來不明白，萊茵河的水準明明比旁邊的冰室優勝，而且價錢相差不遠，但隔壁永遠也是大排長龍，與這店形成強烈對比。

唯一解釋，隔離店店主行緊大運囉，風水命理呢家嘢，我識條鐵咩！

   

 

廢話多了，講番是夜跟朋友們來吃的一餐，叫左好多嘢食，好豐富。吃之前，友人先來啤酒作熱身。

眾人先以蟹肉沙律喚醒味蕾，菜蔬新鮮爽脆，還有開胃有益的紅柚、清甜的車厘茄，以及蟹肉作圑隊，清新可人。

吃過健康的沙律，之後便來到邪惡的芝士雞翼。雞全翼香脆肉嫩，吃時仍燙咀巴，結合車打和Mozzarella兩款芝士，香濃而帶出拉絲的視覺效果，每人一隻好像不太夠喉。不過，接著還點了很多東西，所以沒有「安哥」。

女士竟也揀上黑松露薯條這熱氣的東西，不過，又香又脆，薯味濃的出品，再加埋黑松露醬，實在是值得冒爆瘡這風險。

溫泉蛋鰻魚漢堡，似是九唔搭八的組合，但以63度烹煮的溫泉蛋做得出色，鰻魚總算香甜，味道不俗，稱得上是合格的嶄新出品。

有啤酒梗要有豬手，主角千呼萬喚，終於登場。成品並沒預期之中的巨大，當然亦唔係細，但皮脆而肉嫩，正合食肉獸的心意，有啤酒在手的朋友更大呼過癮，成功俘虜眾人的心。

甜品既紅酒煮梨，梨子夠腍身，亦入味，做足基本要求，正如朋友所講，能配一球雪糕來伴之，就Perfect池喇！

焦糖菠蘿與心太軟，恰如其分，我也沒有投訴。開心最緊要。

餐廳資料:
萊茵河餐廳
荃灣大壩街71號德仁樓第16期地下7號舖
35680786