譽江南 - 哪來的美譽?

食物：$$1/2
環境：$$$
服務：$$$1/2

大概兩年多前，有人問過我，荃灣的大鴻輝中心在哪裡?　

作為荃灣人，筆者當時的答案，竟是不知道，實在太慚愧。

原來，我們熟悉的英皇中心，就是現在的大鴻輝中心。佢既主席，最近花了1800萬，買下官觀工廈的一個車位，破晒紀錄。

呢個大鴻輝中心，樓上設有不少食肆，火鍋店、韓燒等等，但我甚少幫襯，主要因為佢既Lift, 實在太麻煩。

不過，當筆者發現，樓上新開了間上海菜館，而且風評不錯時，又好有興趣，想捉埋屋企人一齊去試。就連我媽都話: 乜你咁鍾意食滬菜架？！

 

失望

當我看見餐牌上有素鮑魚之際，雙眼即時發光，因我太掛念蘇浙滙個出品。然而，呢度既成品上桌，我是徹底的失望，起碼賣相完全不像鮑魚，或許是我的想像力不夠豐富。吃起來，都爽既，都是醬油味囉。
 

易穿

小籠包點都會試啦，四隻之中，有兩隻穿了，幸好本人的那隻沒有事，是我訓練有素吧！論皮薄，論湯汁，論味道，都算正常的。
 

唔會太實既

近排吃得太多紅燒肉，要收斂下，選了紅燒獅子頭取代之。質感尚算鬆化，不易散，但味道可以濃郁一些。
 

了無生氣

上海粗炒就唔掂，了無生氣的，單是色水已知唔夠味，吃幾口，就是如此。有些東西，真是睇見都可斷定唔好食。
 

乾身

最後也來一味菜，我始終是愛香口嘢，菜也要吃干煸四季豆。這裡的，煸得乾身，味道濃，但沒有去衣，是要扣分的地方。

水準，仍不及我家樓下新開的上海館子，一次便夠。

餐廳資料:

譽江南

荃灣眾安街55號大鴻輝中心21樓B室

 2461 1288