Instagram

2015年1月10日 星期六

新店速遞:城中小閣 - 城中新勢力



食物:$$$1/2
環境:$$$1/2
服務:$$$$

臨時臨急,要找個似樣啲既中菜館子食飯聚頭,有時也真不是容易的事。

呢度訂檯已滿,嗰度限時限刻交檯,辛苦晒我的好朋友。

最終,選舉了新開業不久的店子,城中小閣。有朋友之前來過,經驗不差,相信也會比較正路。

光猛企理

店子樓底高,光猛企理,是我喜愛的類型。或許是樓上店,又或許是剛開張沒太多人認識,是晚只得寥寥幾檯客人,看來店方要多加宣傳。
 
小食
大家有商有糧,不過唔係實現所謂普選,只係以民主方式鎖定當晚的菜色。先有小食,是鴨腎,唔會硬轟轟,作為開胃小吃,未嚐不可。
 
燒腩仔較好
我想試試這邊的燒味,便叫了叉燒和燒腩仔雙併。燒腩仔皮脆,層次分明,唔錯。反而,叉燒雖有燶邊,但卻嫌有點過腍。海蜇則做得爽口。
 
蠻不錯
Oli在陣,菠蘿咕嚕肉自會是穩膽。外脆而肉質彈牙,甜酸度平衡得宜,我當然連配角的青椒和菠蘿也不會放過,就恨份量實在太少。
 
不太對辦
瑪姬所揀的砵酒焗蠔,似酥炸生蠔多一些。雖然脆漿不會過厚,咬落仍是鬆脆,蠔本身卻有欠肥美,口感略遜。加之那酸酸的醬汁,跟蠔不是太夾,教人失望。
 
大家食蝦啦! 我食粉絲就得了...
還記得Oli曾極力推介這裡的胡椒海蝦煲,又無理由唔試既。幾隻蝦做得彈牙,不過,風頭始終及不上墊底的粉絲,盡收胡椒的精華,惹味之餘,口感亦佳,果然無介紹錯。
 
BB鴨
服務生主動推介一款燒鴨仔,說牠是鴨仔,真的很BB。無錯是燒得皮脆,但「無肉食」,始終唔係好對口胃。
 
平衡下
食咁多肉,點都要碟菜去平衡番下。一道薑粒炒芥蘭,翠綠而美味。
 
呢個天時岩食
這裡的食物份量都是較為的骰,所以單尾亦須有個飯同麵,才足夠。掀開荷葉飯的葉子,熱氣騰騰,在這個冷冷的天時吃,最合適不過。
 
循例吃點便算
反而,豚肉蕃湯稻庭麵,看見湯色,已令人卻步。

服務生再次奉上餐牌,問大家有沒有興趣品嚐這兒的甜品。其實,我們一早已準備下場。


將會是瘋狂的一役~


餐廳資料:
城中小閣
尖沙咀柯士甸道102號1樓
2730 6808

6 則留言: