食物：$$$$
環境：$$$$
服務：$$$$
灣仔生記呢個老字號，作為老饕既筆者當然已品嚐過，印象最深係佢隻雞，同埋白糖糕。
會展分店，金紫荊生記，我卻仍未有機會到訪，直至今次的老朋友飯聚。
廢話唔多講，今篇帶大家一次過睇晒呢度既八大招牌名菜。
打頭陣的叉燒，採用西班牙黑毛豬梅頭，入口鬆化有蜜味，脂香豐富，帶少少燶邊，乎合晒優質叉燒既特徵。吃擺一件靚叉，再嚐旁邊清甜爆汁的聖女果，岩晒！在不少地方嚐過玻璃蝦球，體型都係唔細，但巨得如此地步的，又真係好罕見。拳頭咁大既蝦球，誇張。不難想像，如此的龐然巨物必定是爽甜，沾點旁邊的蝦醬，更能引出鮮味。最後伴以甜蜜的火方，兩者原來咁夾。接著來的，是有點互動的招牌火焰鹽焗雞。店員先在席前淋上一圈白酒再點火，大家有興緻既話可以出來扑雞，之後店員就會將原隻雞恭整地擺好上碟，賣相有幾分像法式做法。成品自然酒香四溢，雞肉在鹽焗過程中逼出多餘油脂，做到皮香肉嫩。由於用上新鮮雞，附有雞什同吃，相當滋味。脆皮百花釀遼參，我早幾日前在某酒店嚐過類似的菜色，但主角就是花膠。外層十分鬆脆靚仔，海參釀入了鮮甜彈牙的蝦膠，口感更為豐富，自行沾上柚子黑醋汁，有助提鮮解膩。呢個汁醬，為整道菜色拉高了唔少分數。一向喜歡食馬友，卻又怕多刺，呢道已去骨的香蔥海鹽煎馬友就岩晒我。單是金黃的色澤已告之一切，吃起來的確是皮香肉嫩，記緊夾埋香蔥一齊食，正好多。隨之而來的澳洲龍蝦氣勢磅礡，用上熟悉的雞油花雕來炮製，毫無疑問是鮮甜彈牙，香氣撲鼻，陳村粉索盡精華，更是不可錯過。既然呢度既雞做得出色，再來款另一做法的又何妨。以火腿、瑤柱、蝦米熬製的鹵水浸雞，除了雞肉可口，雞皮更是薄如紙，吃起來清脆，重點所在。最後的焗鮮拆蟹砵霸氣登場，成品既充分保留了膏蟹的原汁原味，加上微脆的外層，實在吸引。吃至此時雖已是十一分飽，但都令我誓要將之消滅。印象中以前灣仔生記是沒有點心供應，呢度又會有，其蝦餃燒賣都幾有水準。咁舒適既用餐環境，不論是商務應酬或是家庭飯聚，都肯定錯不了。若是放煙花既日子，呢度真係首選，當然也是一位難求。
餐廳資料:
金紫荊生記粤菜廳
灣仔博覽道1號香港會議展覽中心博覽商場
56973088 (WhatsApp)
好耐無食過鹽焗雞啦，一來少食中餐，二來主子唔食。。。
回覆刪除