海外篇：南苑 - 照顧到南方口胃既我們

食物：$$$1/2
環境：$$$$
服務：$$$$

又再來到澳門美高梅食八方，數年前嚐過北廚，今次要輪到南苑。

顧名思意，北廚是吃餃子、蘭州牛肉拉麵、羊肉串等為主打的北方佳餚，南苑則是專攻香港及廣東等地的南方美食。

今趟團友比較多，所以團長已寫好菜單，打點好一切，非常貼心。

先來些拍青瓜，以及五香金錢牛展作熱身，才再迎來豐盛的菜式。

一大碟的潮州鹵水拼盤，鵝肉、豬手、墨魚、雞蛋，同埋最重要的豆腐，鹵水膽靚，出品自然好。鵝肉嫩滑，墨魚唔會韌，豬手膠質豐富，都是吃得舒服的鹵水嘢。

沒想到搞手會細心到有湯水俾我哋飲，旗參燉烏雞湯，溫度非常充足，加上陣陣花旗參的甘香，好補身。

素來喜歡吃邪惡食物既筆者，見到餐單中的黃金沙蝦球，頓時笑逐顏開。咸蛋黃好足，金沙交足晒功課，可以蝦既質素與預期稍有出入，未至最滿足。

紅蔥頭豆豉鮑粒雞窩，聽個名都知是香口嘢，岩晒我。吃起來的確是惹味，實物同菜名有點不相符，因為佢直頭係用上原隻鮑魚，而非鮑粒。

來個蒜茸炒西蘭花去平衡下，感覺健康一點。

但更健康的是，單尾的炒飯，係玉帶崧子蛋白炒有機紅米飯，好彩佢健康得嚟，仍不失美味。

最後食埋砌得靚靚既生果盤，與及蓮子紅豆沙湯丸，飽到上心口。

餐廳資料:
南苑
澳門孫逸仙大馬路1101號澳門美高梅
+853 8802 2389