海外篇：金悅軒 - 吃得過的點心

食物：$$$$
環境：$$$$
服務：$$$$

已有好陣子沒遊濠江，對上一次來也只逗留在澳門半島那邊吃喝，一直未有機會目睹倫敦人的風采。

因此，數年後再訪，選擇在氹仔這邊，見識下倫敦人及巴黎人的真面目。

在沒訂位的情況下，倫敦人購物中心的金悅軒有個半鐘時間俾我哋，想也不用想，直接走進去。

環境好雅致，點心的價錢比我想像中優惠，似乎沒有來錯地方。

柯打完幾款點心，店員送來小吃。腰果這香口嘢肯定岩我，但帶點辣勁的漬蘿蔔我更欣賞，個頭開得唔錯！

蝦餃押上了金悅的名字，店家咁有信心無理由唔試。一籠原來五粒，我真係第一次見。蝦餃個子比平時在香港嚐到的要小一點，但形狀係靚仔既，餡料除左豐富的蝦肉外，竟仲混入了點薑蓉，好在沒有過辣過搶，幾特別，不過我唔算好中意。

叉燒酥入口鬆化之餘，又是與平時吃的有些分別，皆因除了蜜汁，還加入了山渣汁，吃時帶微微的酸，我會說是恰到好處的酸，令成件事更開胃，又沒有影響我對叉燒酥原有的印象，合心。

在香港的星級酒店吃鮑魚酥，多半是配雞粒，燒鵝都見過，但伴以黑豚肉和菌，又真係幾罕見。撻皮鬆化不在話下，鮑魚十分之軟腍入味，原來與黑豚及菇都好夾，一碟有三件，九十八個大洋，性價比太高了吧！

再來的是生煎雪花和牛包，包身軟熟，餡料調味幾好，底部是像那些冰花餃子的脆底，是有點心思。

甜點就要一款西杏炸鮮奶，吃時要小心，因為好容易會「漏奶」。喜歡佢既杏片鬆脆，也真的是充滿奶香，好有水準，也是我在香港從未嚐過的。

好抵食的店子，有機會要帶兩老來飲餐茶才行。

餐廳資料:
金悅軒
 澳門倫敦人購物中心1樓1057舖