食物：$$$$
環境：$$$$1/2
服務：$$$$
喜歡周圍搵吃的朋友，相信即使未去過、都應該會聽過昔日北京道一號的Aqua Restaurant，佢個景靚真係世一，多年來被喻為全港最美餐廳，當之無愧。
數年前，Aqua離去，遷往前面嗰幢同樣有維港景的食廈，但我一直未有機會見証佢是否同樣美。
而原先北京道一號頂樓的位置，由一間薄餅店承接，其實也是Aqua集團的。
今年小弟生日，朋友就請我來了吃Pizza。慶幸七月既日子，六點半天還是光，可以俾我哋感受到最美的日與夜。瞄一瞄餐牌，食物選擇唔多，除了各式薄餅，也就是一些小食與及甜品。
紅菜頭牛油果沙律，份量看似不大，但食食下都幾飽肚，味道也不俗，始終呢個組合都係相當穩陣。另一款的吞拿魚他他，同樣有牛油果在底下，廚子都幾中意用呢款超級食物入饌喎！
吃完小食，天色開始轉黑，又是另一番的美，我覺得晚上的維港是更加靚的。本身想食富有中式色彩的北京填鴨薄餅，可惜售罄，於是還原基本步，要了最傳統最簡單的Margherita。看薄餅賣相，是正宗的拿波里版本，而芝士、番茄醬和羅勒等的組合，從來討好，所以只要餅底和邊做得好，自然好食。
甜品點選了兩客，提拉米蘇濕潤，味道幾好，屬無乜咖啡酒的版本。由於剛才的薄餅出色，所以甜品都選了薄餅，係香蕉和Nutella的配撘。都係果句，香蕉與朱古力本是好拍檔，加埋做得好的薄餅，就是好。
因為一些誤會，店家額外送了一款甜品給我們，係Panna Cotta。質感偏實在，但因為有莓醬在陣，成件事係幾開胃，岩晒飽到上心口既我們。愉快既一晚，感謝朋友的厚愛~
沒有留言:
張貼留言