冠華粥麵 - 街知巷聞既燒賣

食物：$$$1/2
環境：$$$
服務：$$$1/2

見到呢隻貓，或者大家都已認得係邊度。

無錯，就係荃灣石圍角，賣燒賣賣到街知巷聞的粥麵老店冠華。

我仲以為隨住石圍角商場的大翻新，呢度老字號粥麵店會藉勢結束，但原來佢仍然默默地經營著。

呢度既燒賣，經過傳媒介紹，同埋關注組的討論，早已成為神級，許多朋友會專程跨區來一見其真身，認真誇張。

自家制的出品，個子比坊間的燒賣大粒，咬落無咁多粉，口感較實在，同埋的確會嚐到點點魚肉味。不過我覺得，已沒多年前我首次來吃時的驚艷。順帶一提，呢度既辣油唔錯，沾一點點來配燒賣，絕對有助提升分數。

今趟分別柯打了雲吞麵和牛筋麵，前者外皮是滑，餡料有豬肉有蝦，可是未夠爽口，我麻麻地呢個口感。

反而牛筋，軟腍之餘不失其豐富膠質，是我喜歡的口感，今次牛筋麵完勝雲吞麵。

多口一句，店舖話就話開中午十二點，不過好多時都未Ready，建議大家十二點半左右才來會比較穩陣。

餐廳資料:
冠華粥麵
荃灣石圍角村石芳樓地下7號舖
24939681