2022年1月14日 星期五

I-O-N - 注入本土風味的西餐



食物:$$$1/2
環境:$$$$
服務:$$$1/2 

忽然的禁堂食公告,殺大家一個措手不及,還可以坐低食晚飯的兩天,份外珍惜。

其中一天,與幾位朋友來到中環街市的I-O-N,延續Dining Ground之旅。

可能大家都怕之後唔知幾時先可以再出街食,這一頓晚餐來得特別豐富,人人捧腹而回之餘,亦都要打包。

雖是西餐廳,卻加入了唔少港式原素來烹煮佳餚,如頭盤的凱撒沙律,就採用了充滿大澳風味的銀魚乾來取締煙肉粒,出來的效果也不失禮。

坊間的青口,多半是以白酒煮,以中式的玫瑰露來烹調,孤漏寡聞既筆者確是首次見識,估唔到兩者又幾相襯。

接著送來,係一大盤的小食拼盤,蘿蔔什菜卷、三文魚餅、油甘魚他他、爆谷蝦、避風塘炸魚薯條、牛舌伴番茄莎莎,以及宮保牛粒等,陣容相當鼎盛。將英式炸魚薯條加入了避風塘風味,同埋口感不錯的牛舌,令我留下最深印象。

豬斧頭扒好厚身,但以慢煮形式製作,自能保持嫩滑肉質,帶骨位置尤其精彩,佐以蘋果醬,令成件事更上一層樓。

再來的偽黯然銷魂飯,以魚扮作叉燒,用鵪鶉蛋取締雞蛋,米飯弄成長條型,還做出飯焦的效果,可見廚子的心思。起初還以為是三文魚,實情係銀鱈魚,那嫩滑富油脂的的質感,更能討我歡心。

隨之而來,是兩款意粉。香辣海鮮意大利麵,除了內容豐富外,特別之處是加入了蝦醬,絕對是中西合迫出好味道。原隻波士頓龍蝦意粉,重點不在於開邊的波龍,而是加入了花椒油,其麻香教大家拍案叫絕。

都係果句,『難得的晚餐』,自然要有甜品作結,大大的甜品拼盤,迷你鮮果雪糕芭菲其實並不迷你,花生芝麻心太軟做到流心效果,抹茶窩夫外脆內軟,還有一系列的生果,來慰勞甜胃。

意猶未盡,大家再追加了店方的招牌拿破崙,原味及士多啤梨口味,可惜芒果味售罄,否則都會是我們的囊中物。

酥脆外皮跟吉士的結合,令大家愛不釋手,原味始終更合我心。帶有焦糖風味的蝴蝶酥,清脆怡人。


餐廳資料:
I-O-N
中環皇后大道中93號中環街市1樓124-125號舖




4 則留言: