2021年12月15日 星期三

Yakiniku More - 牛魔過聖誕



食物:$$$$
環境:$$$$
服務:$$$$ 

十二月,大概是吃聖誕大餐的日子,於筆者而言,不一定要食自助餐,但最好找些充滿聖誕氣氛的餐廳食肆。

有人介紹Yakiniku More,作為一個食肉獸,聽見是日本燒肉,已經心心眼,功課都懶得做,風評如何全不知道,就呢度啦!

聖誕套餐 (二人份)有兩款,不同牛肉部位的當然佔其一。為照顧不吃牛的朋友,店方推出的海鮮拼盤,內容亦相當豐富。

有理冇理先來杯啤酒,大啖酒、大啖肉,才夠過癮。

以風乾火腿、芒果及青瓜打造而成的沙律作好準備,I am Ready !

不論食牛餐,抑或係海鮮套餐,每人都有一隻生蠔。令和之怪物,當然不是首次品嚐,肉爽而清新,無乜好重海水味,是這款蠔的特色。

接著來的韓式辣豆腐海鮮湯,又大蝦又青口,足料非常,唯一嫌佢唔夠辣勁,其實唔需要遷就吃不到辣的人喇~

熱身過後,主角的牛肉要登場了。一大盤牛,內容有齊A4和牛蘋果卷、M7肉眼、美國既封門柳,以子厚切牛舌。

日本和牛油香豐富,青蘋果絲正好作個中和,感覺沒那麼膩。澳洲代表的肉眼水準可以,但個人認為軟腍的封門柳更合心。然而全盤最精彩的,是厚切成條狀的牛舌,口感爽脆很吸引,吃一條並不夠喉。

隨之而來的海鮮拼盤頗有氣勢,不讓牛肉專美。龍蝦尾、北寄貝、帆立貝、魷魚與及蟶子皇,款款新鮮。

蟶子、帆立貝及北寄貝等不用考功夫,怎樣燒都唔會韌,特別要提北寄貝,平時我最憎吃這像擦字膠的東西,但北海道的貨色,又是另外一回事。難度最高的是燒魷魚鬚,不能過火,幸好我們都拿捏得宜,沒有過韌。

吃這聖誕套餐,可以優惠價追加迷你三色丼。三文魚籽的爆汁口感自當討好,海膽新鮮,吞拿魚蓉最好下飯。

聖誕套餐其實已非常豐富,只是在場的都是不折不扣的食肉獸,見有個熟成櫃,當中有款三十八天既肉眼,又嚷著要吃,我自當奉陪到底。這款牛,店員會代勞。

吩咐店員,千萬不要燒得太熟,烤香邊位,中芯保持嫩紅,是最佳狀態,真的美味。

水簾洞牛刺身,每晚只供應兩個,我們又有慶嚐到。薄片細嫩的牛肉,佐以酸汁,在飽到上心口時嚐這個,好似又有助消化咁。

套餐之甜品係色彩繽紛的白玉蕨餅雪葩杯,其中的雪葩最有助解滯,在此時很受用。

食肉獸表示滿足。


餐廳資料:
Yakiniku More
尖沙咀棉登徑8號地下5-6號舖
27508800

4 則留言: