2021年11月5日 星期五

四季芬芳 - 將傳統菜色注入新原素



食物:$$$$
環境:$$$$
服務:$$$$ 

好耐無試過放肆地食中式美食,既然是夜有人吹雞去食蛇羹與點心,一於奉陪到底,最多翌日唔食早餐咁話。

中環蛇王芬食得多,其沙田的分支四季芬芳,卻是首次。其實以前在火炭工作時已想來試,但都因為長長的人龍嚇窒而卻步。

幾個餓底,樣樣都想吔,你一言我一語,拼湊出滿桌子的美食,想唔爆肚而歸都幾難。

冷盤的四款東西,都是酒醉系列,感覺都不錯。枝豆以花雕浸淫的做法,倒是比較特別。反觀以這方式做鴨舌與大蝦,從來穩陣。估唔到就連我最討厭的北寄貝,亦不會韌得像吃擦字膠,是個好開始。

有人愛飲湯,而來到蛇王芬的主場,我就幾歹都整碗蛇羹。好足料的出品,甚至加入了花膠,多一份矜貴,吃完好暖身。當然最重要是加入薄脆同吃。

飲飲下蛇羹,服務員開始執我哋張枱,因為一系列的點心馬上送來,單是小籠包已有三款不同口味。正值蟹季,自然要來兩籠鮮香又湯汁豐盈的蟹粉小籠包,黑松露口味的香氣十足,麻辣的一款,夠辣勁,不是點到即止的婆媽貨色。

這裡的腊腸潤腸水準不用懷疑吧,所以幾款腊腸潤腸之點心,我也頗為期待。像米芝蓮人的腊腸卷,家陣愈來愈少地方有得食,這兒造成桃紅色的外表,將傳統的美食變得更吸引。另外,糯米燒賣加入了潤腸,肯定合拍又好食,是另一壯舉。將傳統豬肉餡的咸水角混入了潤腸,又是神來之筆。

再來的一味,外表似荔枝,咬落很彈牙,又多汁,是蝦膠與烏雞湯打造而成的丸子,特別又美味,不過大大粒係幾飽肚。

一場來到,都要食下煲仔飯。白鳝雞肉煲仔飯,前者肥美,雞肉嫩滑,最重要是底下的飯焦,香脆可口,不能錯過。子薑麵醬魚腩煲,更是一致認為全晚最出色的東西。

單單一粒蟹粉小籠包,點會夠喉? 再來碗蟹粉麵食又如何? 大閘蟹粉加上甲羅燒,撈埋個麵,邪惡到底,超標就超標啦!

飽得幾乎獲利回吐,每人半件棗皇糕及士多啤梨糕,令甜胃也得到慰藉。

這頓美食,充分體現出傳統菜色加入了嶄新原素的驚喜。


餐廳資料:
四季芬芳
沙田沙田正街2-8號新城市廣場三期3樓363A號舖
31082187


4 則留言: