2021年8月13日 星期五

花月庭 - 今期係呢兔



食物:$$$1/2
環境:$$$1/2
服務:$$$1/2

疫情影響下,筆者今年食自助餐既次數,大概係近十年最少。

雖然不是特別熱衷任飲任食,但偶爾能與朋友們出來聚一聚,吃到各自喜歡的東西,在今時今日,已是萬幸。

又再一次來到帝京的花月庭,嚐其不同主題的自助餐,今期酒店的合作伙伴,係暑期大熱電影之主角,Peter Rabbit。

一向無乜童真既我,唔太清楚比得兔係咩料,不過滿場的甜品都是兔兔蹤影,仍是令人開心興奮。

出去兜個圈影下相,除了甜品區充滿可愛兔子外,其餘的區域,跟平時差不多。凍海鮮款式豐富,龍蝦青口凍蝦翡翠螺等一應俱全,多羔的龍蝦當然是最搶手,個人最欣賞還是蜆肉,鮮甜味美。

另一要排大隊去攞既,肯定就係即開生蠔,這夜出現的,是法國佳麗,我連吞下了兩隻。若然後生十年,一打走唔甩。

有東西,是每位客人一份的,包括翡翠蠔皇鮑魚。鮑魚身驅比預料中更大,軟腍入味,真想『安哥』。

中西熱葷,也有不少值得推介,如馬來咖喱龍蝦鉗,惹味又唔會辣到噴火;火炙香蔥澳洲M5和牛,入口溶化兼帶蔥香,我一口氣吞下三片;金蒜蟹肉糯米飯,也是可一可再的美食,即使真的很飽肚。

日式嘢除了受大眾歡迎的壽司刺身,與及我愛的冷麵外,各式天婦羅、蒲燒鰻魚串燒、鹽蔥雞肉串等均值得一嚐。

燒牛肉與中式燒肉輪流登場,兩者我也有幸嚐到,皮脆肉咸香的燒肉更有好感,但限量供應,要睇你有無食緣。

當然要留肚食甜品,紅菜頭奇亞籽棒棒蛋糕紅噹噹好吸引,紅嗓子蕃茄白朱古力慕絲蛋糕亦然,加上可愛豬仔的香蕉豬古力撻好睇又好食,中式既流沙奶皇包印上了兔兔在包面,你捨得搣開嗎? 甜點每樣一件,開心飽足。

還有幾款大蛋糕,如合桃甘筍芝士蛋糕,比得兔藍莓蛋糕等,真的太豐富!

仲有最後的驚喜,謝謝大家既安排~


餐廳資料:
花月庭
旺角太子道西193號帝京酒店2樓
26226154

5 則留言: