2021年6月1日 星期二

新華茶餐廳 - 最愛三點三時間



食物:$$$1/2
環境:$$$1/2
服務:$$$$ 

筆者有個習慣,一唔開心就會去蘇屋村,我從小長大的地方,透透氣。

好多時,會係附近食埋才離去。新華是其中的常到之處。

由細食到大,食足幾十年,餐牌上許多東西都嚐過,始終最愛佢既包點蛋撻,以及雞批。

晚上最常吃沙嗲牛肉包,只是用上熱狗包包裹著,不像坊間有些地方會用菠蘿包,沙嗲牛也不用夾著有洋蔥,但微甜、軟腍而質感不會假的牛肉,就是合我心水,大概是小時吃慣的味道。

雞批與蛋撻一樣,要揀岩時間食,若然夜晚才到訪,要嘛已經售罄,要嘛只會嚐到凍冰冰的出品,唔食好過食。

剛出爐既雞批,外皮熱辣酥脆,滿載牛油香,餡料除左雞粒,還有火腿粒及小量磨菇片,很好吃,唯獨是個賣相,有欠吸引,屬實而不華之作。

如你是三點三來的話,呢度既蛋撻總不會讓你失望。酥皮夠鬆化,蛋餡滿有蛋香,亦唔會過份甜,熱得要小心翼翼的品嚐,執筆時想起也真想吞下兩隻。

早一、兩年覺得新華杯奶茶有點飄忽,不過呢幾次去也已回勇,夠香夠滑,茶和奶平衡得恰好。

拜蛋撻關注組所賜,呢期人人又再講起同一條街既金園,有機會我又寫幾筆。


餐廳資料:
新華茶餐廳
長沙灣青山道334號
2387 3698


4 則留言: