Fabrice 嚐味: 玉庭 - 久違了的滿足

2021年3月12日星期五

玉庭 - 久違了的滿足

食物：$$$$
環境：$$$$
服務：$$$$

晚市禁堂食期間，身邊許多朋友會在家打邊爐，有些會在火鍋店叫外賣，有的就自己搞，街市買些海鮮，切點靚牛，來幾款餃子，非常豐盛。

總言之，烚下烚下火鍋關注組，天天都是令人流口水的邊邊照片。

筆者反而甚少係屋企吃火鍋，唔好問點解，我都唔識答你。

等了又等，晚市終於開放，又得知沙田帝都的中菜廳玉庭加插了火鍋項目，肯定要去大快朵頤。

不少火鍋店均有刺身供應，呢度都唔例外，我們點的火鍋套餐，內容是有刺身拼盤的。

新鮮的甜蝦，爽脆之赤貝，甜美既帶子，軟腍不韌的八爪魚，以及港人至愛既法國生蠔，作為美好的開始。

大家都鍾情於海鮮湯底，所以兩個鍋，一是蕃茄蝦濃湯，另一則是北海道3.6牛乳蟹湯。事實上，兩款都是相當足料，湯頭甜得可以直接先喝幾碗的好東西。

套餐有兩款，可揀全牛拼盤，或者全日鮮，均是二人份。我哋一行四人，正好可以試齊兩者，是晚有口福了。

全牛拼盤當中，有四款牛肉，加一客牛舌，由高至低層層放好。最低的是美國安格斯牛小排，軟腍有肉香，質素已很不俗。放高一級的有澳洲M7和牛肉眼，肉質更為軟熟。

最高的兩層，皆是 A5級數既日本和牛，分別是九洲的薩摩牛，與及佐賀之代表。兩件均是入口溶化的好貨色，個人認為不相伯仲，無謂硬要去分高下。

全日鮮，顧名思義就是海鮮拼盤，又波龍又南非鮑又北海道帶子又大蜆，陣容相當鼎盛。最有興趣是勁厚身的北海道帶子，先試一粒。刺身級別的貨色，鮮甜到一個點。南非孔雀鮑的個子蠻巨大，卻完全不會韌。開邊的波士頓龍蝦，不用淥太耐，肉質保持細嫩，龍蝦鉗從來也更精彩。一下子將全部的大蜆放入蕃茄湯內，令這鍋本來已吸引的湯頭，甜上加甜。