食物：$$$1/2
環境：$$$$
服務：$$$$
肺炎肆虐，偉大既正苦推出一系列的防疫措施，餐飲業下場慘絕人寰之外，一群教練亦叫苦連天。
當然了，學校停課，室內體育館及會所康體設施關閉，任你好波到曉飛，也被迫要休業。
與相識廿載的乒乓球教練陳Sir食晏，已停工四個月的他一臉愁容，從沒見過佢如此沮喪。這個時候問他吃什麼，肯定得不到答案，乾脆由我話事好了。
午餐跟上的沙律，以一隻小金杯作盛器，顯得高貴。用上今期流行的黎麥及羽衣甘藍，可見店子走新派路線。味帶回甘的羽衣甘藍伴上日式胡麻醬，算得上是恰當的配搭，至少我受落，作點綴的車厘茄清甜多汁。
我既選擇係船粉。明明想吃以牛為主角的，但開口卻又講左手切蝴蝶腩豬肉丸船粉，將錯就錯吧！
呷口湯，頗濃郁的。豬腩肉質鬆化，帶肥脂位當然更加甘香。豬肉丸口感正常，豬紅亦然，香脆的炸豬皮繼續成為最佳配角。據知粉條是泰國空運直送的手造幼粉，入口是細滑的好東西，只是個人並不太喜歡缺乏咬口的麵條。
陳教練揀食手撕豬手漢堡，一刀插入漢堡心臟之賣相，有感情操高尚。切了少許來試試，以手撕豬手取代牛肉，入口嫩滑汁醬醒胃，卻沒有犠牲口感，羽衣甘藍取締甜生菜也是大勢所趨，結合蕃茄、紫洋蔥，以及微脆的包身，合格以上的出品。漢堡旁邊放著一埋健康的羽衣甘藍沙律，及熱氣到死既炸薯條，難為正邪定分界。
咖啡免費跟餐，泰式奶茶卻要另加十八個大洋，我梗係選擇前者。其實，都幾香濃啦！
以為繁忙時間會有點客，已有心理準備隨時還枱，結果卻是大把吉位...
百無聊賴，飯後逛下商場，整個K11水盡鵝飛~
真係好無奈，唉！不過無論如何，大家都要撐住！
回覆刪除唉！香港人要撐住啊！
回覆刪除