家傳滬曉 - 放肆團年飯

食物：$$$1/2

環境：$$$$

服務：$$$$

挨年近晚，忙於跟各伙伴/朋友吃團年飯是常識吧！

為遷就我哋幾個大西北人，搞手好貼心咁揀左美孚的家傳滬曉，作是晚的團年飯聚地點。

餐廳位於曼克頓山商場內，距港鐵站說遠不遠，卻又不是連接住站口咁方便，所以比較少外區人會專程而來，做的都是街坊生意。可能口碑已傳外去，儘管是平日的晚上，也座無虛席。

   

吃團年飯還是要講意頭，一記撈起少不了。青瓜絲、蛋絲、雞絲、冬菇絲、蝦及素翅等等的食材排得靚靚仔仔，淋上了撈起醬，大家可以拿起筷子，起勢咁撈呀撈，撈得愈高愈好。

醒胃的汁醬，爽脆的食材，還配合了雞絲，乃很不錯的撈起，同時亦打開了大家的胃口。

始終這裡是吃滬菜的地方，冷盤整番個素鵝就包無錯。金黃色澤，皮脆而不韌，餡料足，做得幾好。

再來的一味，桂花糖年藕，驟眼看上去還以為是蝦球。然而，呢個爽脆的年藕，與甜甜蜜蜜的桂花糖，是非常合拍，我是難得地要encore一件。

筆者對片皮鴨實太著迷，加上有最中意叫鴨既阿茵在場，又點會缺少一隻片皮鴨呢？！

軟熟的麼麼皮，包裹著青瓜絲、山楂條、鴨皮鴨肉，再塗上鴨醬，令人難以忍口，飽極也要吃三件才收手。若不是是晚菜色太豐富，我一定可以多吃幾片。呢度仲會俾埋鴨髀你慢慢齒，過足癮～

接住上的利事大豐收，即我們認識的發財大利好市。個人向來喜歡蠔豉的口感，豬脷亦夠晒軟腍，冬菇厚身，當然吸晒汁醬的生菜，也是好味道。

年年有餘端上桌，我呆了一呆，一眼便看出是東升了。以往吃糖醋魚，桂花魚、青衣柳等都吃得多，用上東星斑我真是首次品嚐。酸度足的汁醬，與炸至香脆的東星，矜貴又精美。

吃過菜苗平衡下後，是十一成飽。

但來到滬菜館子，再飽也要吃小籠包吧！湯汁多，皮不易破穿，水準比預期中好。

最後才吃些糕點，呢餐團年飯，認真放肆～

餐廳資料:
家傳滬曉
荔枝角寶輪街1號曼坊地下G06-07號舖
22660022