JW Cafe - 高質自助餐

食物：$$$$

環境：$$$$

服務：$$$$

屈指一算，大大話話十年沒到過金鐘Marriott食自助餐，但在我印象中，佢依然穩佔三甲。

咁少來的其中一個原因，係呢度唔容易訂枱，即便是平日，也是一位難求。

十年人事幾番新，回看這十年的轉變，實在巨大得難以置信。Marriott 食自助餐的地方，亦由萬豪咖啡室，易名為今天的JW Cafe。

   

有點不變，是Buffet的水準，仍舊非常高，再次鞏固其在我心目中的地位。

忙碌完過來，時候已不早，但東西沒有像被『山竹』蹂躪過咁亂晒大龍，可見食客是相對高質。同時，也証明食物refill得頗為頻密。

一開波, 幾片Cold Cut後，便向凍海鮮進發。佢既凍海鮮好有睇頭，開邊波士頓龍蝦外，仲有五款蟹，要勁鮮甜的有花蟹，要多羔的可揀麵包蟹，仲有自助餐較罕見的加菲蟹，而啖啖肉的蟹腳亦相當甜美。

各式沙律菜擺放得高貴過人，絕不會被夾到七國咁亂，而且一目了然，令人食慾倍增。

中西熱葷好吸引，但個人會比較欣賞中式的多一些。既然以蟹為主題，中式的就有惹味的避風塘炒蟹，同埋足料非常的焗釀蟹蓋，仲有好耐無食過的蟹肉燴伊麵，well，是用上皇帝蟹的。

除此以外，亦保留了經典的花膠海參及鮑魚，其中海參口感唔錯，鮑魚唔怕太韌，且入味。燒味類有叉燒，雖是偏瘦，都唔會硬轟轟。海南雞肉質嫩滑，仲有我喜愛的片皮鴨，來兩份才夠喉。

我既頂級推介，是蟹肉雲吞，形狀呈金魚尾，皮薄而滑，餡料足又爽口，自行加些少辣椒醬，好食到飛天，吃得大家直榿拇指！

食肉獸既我，本來一心是吃燒牛肉和羊架，不過大家均說龍躉更值得試，始終是坊間的自助餐少見，一吃果然不錯。

胃納太有限，其餘的西式嘢，如煎鴨胸、貴妃豬、意粉等等，只能淺嚐。

以各式蛋糕，提拉米蘇，以及笑口棗等慰藉甜胃，當然沒有投訴。但要重點一提七點半與九點新鮮出爐的芝士撻，熱辣辣，香噴噴，撻皮酥脆，芝味濃，高水準。不過呢個真係手快有，手慢無。

是的，結尾不再是咖啡，而係一壺伯爵茶！

餐廳資料:
JW Cafe
金鐘金鐘道88號太古廣場香港JW萬豪酒店5樓
28108366